Dzúdodan Qazaqstan ulttyq qurama komandalary búginde Azıa chempıonatyna qyzý daıyndalýda.
Qurlyqtyq báseke qarsańynda ulttyq quramaǵa fransıalyq mamandar qosyldy, dep habarlaıdy Almaty-akshamy.kz Olympic.kz-ke silteme jasap.
Ksave Mondenks men Stefan Traıno tek qana eresekter quramasymen emes, jasóspirim jáne jastar komandalarymen de arnaıy baǵdarlama aıasynda birge jumys isteıtin bolady.
"Qazirgi tańda dzúdo Fransıada óte qatty damyǵan, nómiri birinshi sport bolyp tabylady.. 2022 jyldy qosa alǵanda, fransıalyq dzúdoshylar Olımpıada, álem chempıonattary men álemdik jarystar nátıjesi boıynsha Japonıany basyp ozyp, birinshi orynda tur. Byltyrǵy Tokıoda ótken Olımpıada oıyndarynda Fransıa quramasy Japonıany fınalda iri eseppen (4:1) jeńip, aralas komandalyq esepte Olımpıada chempıondary atandy.
Qazaqstanǵa kelgen qos maman osy ýaqytqa deıin dzúdodan Fransıa quramasynda jattyqtyrýshy qyzmetterin atqarǵan. Bireýi sportshylardyń fızıkalyq daıyndyǵyna jaýapty bolsa, ekinshisi jalpy quramanyń júıeli jumys isteýine, quramanyń strategıasyna jaýapty maman retinde qyzmet atqarǵan.
Buǵan deıin qos maman Almatyda jastar quramasynyń oqý-jattyǵý jıyndaryna qatysyp, jastarmen, olardyń kúresimen tanysty. Qazirgi tańda erler jáne áıelder quramasymen birge Aqmola oblysynda oqý-jattyǵý jıyndaryna qatysyp, ulttyq qurama sportshylarymen jiti tanysýda.
Dzúdoshylar úshin osy olımpıadalyq kezeńge arnaıy baǵdarlama daıyndalǵan. Ksave Mondenks menStefan Traıno ár sportshymen jeke tanysyp, bekitilen baǵdarlama aıasynda quramanyń bas bapkerlerimen birge sportshylarmen jumys isteıdi.
Quramaǵa sheteldik mamandardy shaqyrý álemdik tájirıbede bar dúnıe. Bizdiń búgingi seriktestigimiz Qazaqstan dzúdosy úshin oń nátıje beredi dep senemiz", - deıdi Qazaqstan dzúdo federasıasynyń prezıdenti mindetin atqarýshy Asqat Jitkeev.