Búgin Dýshanbede Qazaqstannyń Tájikstandaǵy Mádenıet kúnderi aıasynda qazaqtyń uly aqyny Abaı Qunanbaevtyń bústi saltanatty túrde ashyldy.
Taý tulǵaǵa arnalǵan eskertkish Dýshanbedegi Ábilqasym Fırdaýsı atyndaǵy mádenıet jáne demalys saıabaǵynda ornatylǵan, dep habarlaıdy aqshamnews.kz
Ashylý rásimine qatysqan Mádenıet jáne aqparat mınıstri Aıda Balaeva bul shara eki halyqtyń yntymaqtastyǵyn arttyra túsetinin aıtty.
«Búginde Qazaqstan men Tájikstandy Memleket basshylarynyń dostyq pen ózara senimge negizdelgen kúsh-jigeri ǵana biriktirip otyrǵan joq. Tájikstan astanasy da qazaq halqynyń dańqty perzentiniń tulǵasy tuǵyrǵa qonǵan álem astanalarynyń birine aınalady. Bastysy, bul qadam eki el ómirindegi mańyzdy oqıǵa bolýymen qatar, qos halyqty jaqyndastyra túsetin rýhanı jáne mádenı baılanystarǵa tyń serpin bereri sózsiz», - dedi Aıda Balaeva.