2022 jyldyń 4 qazanynda Avstralıanyń Melbýrn qalasynda «Bórte - álem hanshasy» spektakliniń tusaýy kesilmek.
Sahnalyq qoıylym kózi tirisinde ańyz adamǵa aınalǵan otandyq jazýshy, dramatýrg Dýlat Isabekovtyń tanymal pesasynyń negizinde qurylǵan. Qazir daıyndyq jumystary qyza tústi. Basty róldi somdaıtyn aktrısany tańdaýǵa erekshe mán berilgen, dep habarlaıdy Almaty-akshamy.kz.
«Eýropalyq dramatýrgter óz shyǵarmalarynda ondaǵan jyldar boıy tek er adamdardy bas keıipker etýdi ádetke aınaldyrǵan. Áıel obrazy joqtyń qasy deýge bolady. Olar úshin Bórte - sensasıa, tyń jańalyq. Shyńǵysqandy jaqsy biledi. Bórte jaıynda biletini az ǵana. Sondyqtan olar pessany jaı ǵana "Bórte" emes, "Bórte - álem ımperatrısasy" dep atady. Men bul ataýdy qýana qabyldadym», - deıdi jazýshy Dýlat Isabekov.
Dýlat Isabekov premeraǵa óziniń qatysýy ekitalaı ekenin aıtady. Bórte beınesin somdaıtyn shetel akterleriniń oıynyn balalary baǵalap qaıtady. Bul - aldaǵy jospar. Erteńgi kúni Almatyda jazýshynyń shyǵarmashylyǵyna arnalǵan baspasóz máslıhaty ótedi. Onda Dýlat Isabekovtyń jaqynda shved tiline aýdarylǵan shyǵarmalarynyń jınaǵy kópshilikke tanystyrylady.
«Bes pesa men úsh áńgime. Olardy shved akademıasynyń múshesi, Nobel syılyǵynyń laýreaty Bengt Samýelson aýdardy», - deıdi jazýshy Dýlat Isabekov.
Jazýshy shyǵarmashylyǵy shetel oqyrmanyn nesimen qyzyqtyryp, qalaı baýrap alǵanyn ózi de bilmeıdi. «Tabys kiltiniń syry nede ekenin de aıtý qıyn» deıdi. Ulylyq qarapaıymdylyqta ekeni barshaǵa málim. Endi bir «Tranzıttik jolaýshy» qoıylymyn álemdik teatrlar sahnalaýǵa asyq. Bul týyndy aldymen Sankt-Peterbýrgte, keıin Londonda ónersúıer qaýymnyń aıyzyn qandyrǵan edi. Dál osy qoıylym álem sahnalaryndaǵy otandyq jazýshynyń tyń eńbekteriniń sherýine bastaýy boldy. Endigi kezekte - Melbýrn. Kúzde avstralıalyq kórermen tarıhı tulǵa Bórteniń beınesin barynsha tanıtyn bolady.