Áleýmettik jeli qoldanýshylary "Dos-Muqasan" ansambliniń solısi Murat Qusaıynov nege áli kúnge deıin "Qazaqstannyń halyq ártisi" ataǵyn almaǵanyn aıtyp, talqylap jatyr, - dep habarlaıdy aqshamnews.kz tilshisi Tengri Life-qa silteme jasap.
Daý neden bastaldy?
Threads jelisindegi "nege Murat Qusaıynovta "Halyq ártisi" ataǵy joq, al keıbir jas ánshilerde bar?" degen jazba tarady. Ol mıllıonnan asa qaralym jınap, ondaǵan pikir týdyrdy.
Pikirlerde qoldanýshylar bul ádiletsiz ekenin aıtyp jazǵan.
Mınıstrlik ne deıdi?
Vedomstvo Murat Qusaıynovta rasymen de "Qazaqstannyń halyq ártisi" ataǵy joǵyn rastady. Sondaı-aq, mınıstrlik bul ataqty berý týraly eshqandaı resmı ótinish túspegenin aıtty.
"Murat Qusaıynovqa "Halyq ártisi" ataǵyn berý týraly ótinish túsken joq. Qazir memlekettik marapattarǵa qujat qabyldaý merzimi aıaqtaldy. Kelesi jyly tıisti túrde rásimdelgen qujattar men ótinish tússe, mınıstrlik olardy belgilengen tártippen qaraýǵa daıyn", – dep túsindirdi vedomstvo ókilderi.
Sonymen qatar, mınıstrlik Qusaıynovtyń buǵan deıin de birqatar joǵary marapatqa ıe bolǵanyn eske saldy:
-
"Qazaqstannyń eńbek sińirgen ártisi";
-
"Qazaqstannyń eńbek sińirgen qaıratkeri";
-
"Qurmet" ordeni;
-
"Parasat" ordeni.
"Halyq ártisi" ataǵy kimderge beriledi?
Mınıstrliktiń túsindirýinshe, 2023 jyldan bastap "Qazaqstannyń halyq ártisi" ataǵy teatr, sırk, mýzyka nemese kıno salasynyń damýyna eleýli úles qosqan mádenıet qaıratkerlerine beriledi.
Mańyzdy sharttardyń biri – úmitkerde buǵan deıin "Qazaqstannyń eńbek sińirgen ártisi" nemese "Qazaqstannyń eńbek sińirgen qaıratkeri" sekildi qurmetti ataqtardyń biri bolýy kerek.
Vedomstvo marapat berý tártibi "Memlekettik nagradalar týraly" zańda jáne Prezıdenttiń 1999 jylǵy 8 qarashadaǵy № 90 Jarlyǵymen bekitilgen nusqaýlyqta jazylǵanyn atap ótti.
"Prezıdent Memlekettik nagradalarmen marapattaıdy. Nagradaǵa usyný týraly usynystardy Prezıdentke Parlament, Úkimet, mınıstrlikter, agenttikter, ózge de ortalyq jáne jergilikti atqarýshy organdar, shyǵarmashylyq odaqtar, eńbek ujymdary jáne basqa da uıymdar engizedi", – dedi mınıstrlik.