Elimizde taǵy jeti ziltemirshiniń basy daýǵa qaldy
2014 jyldan beri 123 sportshymyz dopıngke baılanysty sporttan shettetilgen. Onyń ishinde eń kóbi aýyr atletıkada, ıaǵnı 25 jaǵdaı. Tizimdi jeńil atletıka, armrestlıng, kúres jáne velosport jalǵaıdy, dep habarlaıdy Almaty-akshamy.kz.
Buǵan deıin Ilá Ilınniń sońynan sóz erip, alǵan júldesin qaıtarsa, endi Nıdjad Rahımov ta sonyń kebin kıdi.
Basy daýǵa qalǵan taǵy 6 ziltemirshimiz bar. Olar - Abylaı Áýelhanov, Iýlıa Potasova, Rýfına Shalqarova, Alekseı Drozdov, Matveı Makrýshın jáne Tokıo Olımpıadasynyń qola júldegeri Igor Son. Ulttyq dopıngke qarsy ortalyǵynyń tekserisinen keıin barlyǵynyń synamasy oń nátıje kórsetken.
– 9 aqpan men 2 naýryz aralyǵynda aýyr atletıkadan ulttyq qurama múshelerin jarystan tys dopıngke qarsy tekserý kezinde 6 sportshymyzdyń synamasy oń nátıje kórsetti. Olardyń barlyǵy - Almaty oblysynyń ókilderi. Dopıngke qarsy «nóldik tózimdilik» saıasaty negizinde federasıa tarapynan ishki tergeý jumystary júrgiziledi, - dedi QR Aýyr atletıka federasıasynyń sporttyq dırektory Roman Temirjanov.
- Osyǵan baılanysty federasıadaǵy jaýapty adamdardy qyzmetinen bosatyp, ornyna bilikti mamandardy alý kerek, – deıdi Aıdar Mahmetov. Onyń aıtýynsha, kez kelgen sportshy dopıngke qarsy synamany eki qutyǵa bólip tapsyrady. Kóbine birinshi ydysta anyqtalǵan oń jaǵdaıdan keıin, óziniń kinásin ishteı biletinder ekinshi qutyny ashtyrýǵa asyqpaıdy. Óıtkeni odan keıin de testileý qorytyndysy oń nátıjeni kórsetse, sporttan shettetý merzimi 2 ese uzarady.