Qatarda ótip jatqan fýtboldan 2022 jylǵy álem chempıonatynyń tórtinshi oıyn kúninde, 23 qarashada, E tobynda eki kezdesý ótedi
Alǵashqysy Germanıa jáne Japonıa arasynda bolady. Oıyn elorda ýaqytymen 19:00-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.
Germanıa quramasy álem chempıonatynyń fınaldyq satysyna 20-shy márte qatysqaly otyr. Buǵan deıin 1954, 1974, 1990, 2014 jyldarda chempıon atansa, 1966, 1982, 1986, 2002 jyldarda kúmis, 1934, 1970, 2006, 2010 jyldarda qola júldeger boldy.
Olardyń qarsylasy - Japonıa dúbirli dodada jetinshi márte baq synaıdy. Olar 2002, 2010, 2018 jyldarda 1/8 fınalǵa deıin jetti.
Eki qurama úshinshi márte sheberlik baıqasady. Alǵashqy ekeýi joldastyq kezdesý retinde ótkizilgen. 2004 jyly Germanıa 3:0 esebimen jeńiske jetse, 2006 jyly 2:2 esebimen teń tarqasty.
Atalǵan toptaǵy taǵy bir kezdesýde Ispanıa men Kosta-Rıka sheberlik baıqasady. Oıyn elorda ýaqytymen 22:00-de bastalyp, ony «Qazaqstan» telearnasynan tikeleı efırde tamashalaýǵa bolady.
Álemdik fýtbolda ózindik orny bar Ispanıa dúbirli dodaǵa 17-shi márte keldi. Qazirge deıin 2010 jyly chempıondyq tuǵyrǵa kóterildi.
Al Kosta-Rıka fýtbolshylary aıtýly alamanǵa jetinshi márte qadam basty. Ázirge eń joǵary jetistigi retinde 2014 jyly 1/4 fınalǵa deıin jetkendigin aıtýǵa bolady.
Eki qurama buǵan deıin úsh márte kezdesti. Onyń ekeýinde ıspanıalyq fýtbolshylary basym tússe, bir kezdesý teń nátıjemen aıaqtaldy.