Alyp megapolıstiń qoǵamdyq tártibin qamtamasyz etetin 5571 áskerı bóliminde Ulttyq dombyra kúni sarbazdar arasynda «Kúı kúmbiri» atty shaǵyn baıqaý uıymdastyryldy. Atalǵan is-sharanyń maqsaty – ulttyq qundylyǵymyzdyń mártebesin kóterý, nasıhattaý.
Mereke kúni sarbazdar ulttyq aspabymyzdyń tarıhy jaıynda áńgimeledi. Artynsha ónerli ulandyq jaýyngerler dombyra shanaǵynan birinen soń biri kúmbirletip kúı tókti. «Balbyraýyn», «Erke sylqym», «Saryarqa», «Adaı» syndy keńinen tanymal kúıler shertildi.
Bul jarysta Materıaldyq-tehnıkalyq qamtamasyz etý rotasynyń sarbazy qatardaǵy jaýynger Danıl Ott erekshe kózge tústi. Sheshen ultynyń ókili bolsa da, qazaqtyń qońyr úndi dombyrasynyń qulaǵynda oınap, jınalǵandardy erekshe tánti etti. Ol áskerge Jambyl oblysy, Jýaly aýdany, Baýyrjan Momyshuly aýylynan shaqyrylǵan. Azamattyq boryshyn ótep júrgenine 7 aıdan asypty.
– Men alǵash áskerge kelgende, eń aldymen anamnyń qadirin jaqsy túsindim. Meni osy ýaqytqa deıin tárbıelep ósirgeni úshin anama sheksiz alǵysymdy bildiremin. Anammen kezdeser kúndi asyǵa kútýdemin. Áskerge kelgeli aldymen ádep pen tártipti úırendim. Moınyma artylǵan jaýapkershilikti jete túsindim. Áskerı tártip meniń azamat retinde tolyq qalyptasýyma múmkindik berip jatyr. Alǵash ásker qataryna qabyldanǵan sátim men qazirgi kezimdi salystyrmaly túrde saralaıtyn bolsam, ózimnen úlken ózgerister baıqalady. Áskerı tártipke úıretip, osy salada baǵyt-baǵdar berip júrgen komandırlerime de alǵysym sheksiz. Al dombyra shertýdi bala kúnimnen jaqsy kóremin. Mektepte oqyp júrgende qatarlastyrymmen túrli jarystarǵa qatysatynbyz, qyzyǵýshylyǵym sodan bastaldy, – deıdi Danıl.
İs-shara sońynda 5571 áskerı bóliminiń komandıri polkovnık Maqsat Baımaǵulov sahna tórine kóterilip, baıqaýǵa qatysqan, ónerge jaqyn sarbazdarǵa rızashylyǵyn bildirdi.