Astana máslıhatynyń depýtaty Sáýle Samıdın elordada ótken Djennıfer Lopestiń konserti men onyń sahnalyq kıimderine qatysty óz jazbasynan keıin týyndaǵan pikirtalasqa pikir bildirdi, - dep habarlaıdy Aqshamnews.kz.
Áleýmettik jelilerdegi reaksıa ártúrli boldy: kópshilik depýtattyń ustanymyn synap, odan góri mańyzdy máselelerge kóńil bólýge shaqyrdy. Sáýle Samıdın qazaqstandyqtardyń belsendiligine alǵys aıtyp, konstrýktıv dıalogqa ashyq ekenin alǵa tartty.
"Mundaı reaksıaǵa shyn júrekten alǵys aıtamyn. Bul – ashyq ári kez kelgen nársege beıjaı qaramaıtyn qoǵamda ómir súrip jatqanymyzdyń belgisi. Túrli pikir aıtyldy – qoldaǵandar da, synaǵandar da boldy. Onyń barlyǵy da mańyzdy. Biraq meniń jazbam tek sahnalyq obrazdarǵa emes, elimizde osyndaı sharalardyń ótkizý mańyzdylyǵyna da qatysty ekenin aıtqym keledi", – dedi ol Tengri Life-ǵa bergen suhbatynda.
Depýtattyń aıtýynsha, bul eshkimdi synaýǵa baǵyttalǵan jazba emes, ol jeke tulǵa jáne ana retinde kózqarasyn bildirgen.
"Bul meniń shynaıy, adam ári ana retinde reaksıam edi. Qyzym nebári 16 jasta. Konsertten keıin: “Anashym, Djeı Lonyń Dýbaıdaǵy kıimderi múlde basqa, jabyqtaý boldy ǵoı” dedi. Ana retinde men buǵan beıjaı qaraı almadym", – dep túsindirdi ol.
Samıdın mádenıetke laıyqtaý máselesin kótergenin aıtty.
"Men Djennıfer Lopesti myqty áıel, álemge tanymal ártis retinde qurmetteımin. Ol – shabyt syılaıtyn tulǵa. Biraq meniń pikirim syn emes, elimizdiń konteksindegi mádenı jarasymdylyq jaıly oı edi. Biz mádenıet, týrızm, kreatıv ekonomıka týraly aıtyp otyrmyz, mundaıda shyǵarmashylyq erkindik pen jergilikti normalar arasyndaǵy tepe-teńdik mańyzdy", – dedi depýtat.
Onyń pikirinshe, halyqaralyq sahnada óner kórsetetin ártister jergilikti mádenı erekshelikterdi eskerý kerek.
"Bul senzýra emes. Bul – qurmet. Konteksti túsiný. Ásirese, kórermenniń ishinde jastar men otbasy kóp bolatyn buqaralyq is-sharalarda bul óte mańyzdy", – dep qosty ol.
Samıdın tek is-sharanyń formatyn emes, onyń qoǵamǵa áserin de talqylaý qajet dep esepteıdi.
"Mundaı konsertter bizge kerek. Biraq eger biz mádenı ortalyqqa aınalǵymyz kelse, etıka jáne qalyptasyp jatqan orta týraly da aıtýymyz kerek", – dedi depýtat.
Sóz aıaǵynda Sáýle Samıdın azamattardyń jol jaǵdaıy, balabaqsha tapshylyǵy men áıelderdi qoldaý máseleleri jónindegi eskertýleri nazardan tys qalmaǵanyn aıtty.
"Men áıelder qaýipsizdigi, balalar mekemeleriniń qoljetimdiligi, medısına men qalalyq ınfraqurylymnyń jaı-kúıi týraly máselelerdi únemi kóterip kelemin. Sonymen qatar, iri is-sharalar tek mádenı qundylyq ákelip qoımaı, ınfraqurylymdy damytyp, bıznesti jandandyryp, jumys oryndaryn ashýyna yqpal etýge tıis dep esepteımin. Men árdaıym dıalogqa ashyqpyn jáne azamattar tarapynan keletin synı usynystardy quptaımyn", – dedi ol.
Eske sala keteıik, buǵan deıin Astana máslıhatynyń depýtaty Sáýle Samıdın AQSH ánshisi Djennıfer Lopestiń sahnalyq kıimderine qatysty pikir bildirip, qazaqstandyqtardyń nazaryn aýdarǵan bolatyn. Jelide jarıalanǵan jazbadan keıin qoǵamda pikirtalas týyndady. Kópshilik depýtatty halyqtyń kúndelikti máselelerimen aınalyspaı, ánshiniń kıimine nazar aýdarǵany úshin synaǵan edi.