Aqtaýda qoǵamdyq ájethanada las edende uıyqtap jatqan balalardyń sýreti jarıalanǵannan keıin, ákimdik ókilderi otbasyna baryp tekseris júrgizdi. Balalardyń anasy jaǵdaıdy jaqsartpasa, olardy memleket qaraýyna alý máselesi qaralýy múmkin, - dep habarlaıdy Aqshamnews.kz.
Aqtaý ákimdiginiń baspasóz qyzmeti 4 tamyzda mamandar oqıǵa ornyna baryp, sýrettegi otbasynyń keıingi birneshe jyl boıy memlekettik áleýmettik baǵdarlamalar aıasynda kómek alyp kele jatqanyn anyqtaǵan.
"Balalardyń anasy - jalǵyzbasty. Buǵan deıin ol jetim retinde kezekpen turǵyn úı alǵan. Otbasy ataýly áleýmettik kómek te alyp otyr. Balalardyń ájesi dál osy qoǵamdyq ájethanada kasır bolyp resmı jumys isteıdi. Anasy birneshe kún buryn balalardy ájesine qaldyryp ketkeni belgili boldy", – dedi ákimdik ókilderi.
Mamandar balalardyń anasy tirkeýde turǵan úıge de barǵan. Onda antısanıtarıa, esikter synǵan. Tekserý kezinde balalar ápkesiniń úıinde bolǵan. Aıta keteıik, ápkesi de jetim retinde memlekettik baǵdarlama arqyly baspana alǵan.
"Qamqorshylyq jáne qorǵanshylyq organdary otbasyǵa tekserý júrgizip, túsindirý jumystaryn ótkizdi. Balalardyń anasy resmı túrde balalardyń kútimi men tártibine jaýapkershilik alýǵa daıyn ekenin málimdedi. Qazir balalar anasynyń ýaqytsha baqylaýynda, bul sheshim apta aıaǵyna deıin jaramdy", – delingen jergilikti atqarýshy organnyń habarlamasynda.
Ázirge balalar ápkesiniń úıinde. Al anasyna jaǵdaıdy bir apta ishinde retteý mindetteldi. Eger sol ýaqyt ishinde másele sheshilmese, balalardy alý máselesi qaralatyn bolady.
"Memleket otbasyǵa barlyq qajet kómekti kórsetip otyr: baspana berilgen, áleýmettik tólemder taǵaıyndalǵan, negizgi qyzmetterge qoljetimdilik qamtamasyz etilgen. Alaıda usynylǵan resýrstarǵa qaramastan, bul otbasy músheleriniń keıbiri áli de qoǵamǵa jat ómir saltyn ustanyp keledi, bul balalardyń ál-aýqatyna teris áser etip otyr", – dep qorytyndylady ákimdik.
Eske salaıyq, buǵan deıin 15-shaǵynaýdandaǵy jaǵalaýda ornalasqan qoǵamdyq ájethanaǵa barǵan turǵyndar sumdyq kóriniske kýá bolǵan: edende balalar uıyqtap jatqan, al kasır áıel mas kúıde otyrǵan. Bul jaǵdaı qoǵamda rezonans týǵyzǵannan keıin tekseris bastalyp, kasır jumysynan qýyldy.