Dımash Qudaıbergenniń polshalyq fan-klýby Naýryz meıramyn birqatar merekelik is-sharalarmen atap ótti. Ol is-sharalardyń biri jáne biregeıi «Dımashpen birge Qazaqstandy aralaıyq» atty ústel oıynynyń tusaýkeseri boldy.
Bul strategıalyq oıyn qatysýshylardy Dımash Qudaıbergenniń týǵan jerine saıahat jasaýǵa shaqyrady, dep habarlaıdy aqshamnews.kz.
Dimashnews.com saıtynyń málimetinshe, oıynshylar Qazaqstannyń keremet jerlerine baryp, qazaq eli men mádenıeti týraly qyzyqty derektermen tanysady. İs-sharanyń basty syılyǵy – Astanadaǵy gıpotetıkalyq konsert jáne Dımashpen kezdesý bolady. Oıyn polák jáne aǵylshyn tilderinde qol jetimdi jáne jaqyn arada qazaq jáne ıspan tilderinde de jaryq kóredi. Oıynnyń avtorlary: Magdalena Holda, Sılvıa Shaıter-Zıýlek, Katajına Stshelınska.
Tusaýkeser ánshiniń jankúıerleri óz ónerlerin kórsetip qana qoımaı, naǵyz qazaq dastarhanyn jaıǵan Varshava mýltımádenı ortalyǵynda ótti. Dastarhanǵa baýyrsaq, irimshik, jent jáne qurt sıaqty dástúrli taǵamdar qoıyldy. Barlyq táttilerdi jankúıerler ózderiniń jeke resepti boıynsha daıyndady.
Sharaǵa Qazaqstan ókilderi Nuráli Omarqul men Nurhan Ábishev qatysyp, Naýryz meıramynyń tarıhymen, onyń sımvoldary – «Naýryz kóje» taǵamy, ulttyq kúres pen at báıgeleri týraly aqparatpen bólisti. Kezdesý sońynda olar qazaqtyń ádet-ǵurpy boıynsha shashý shashyp, qonaqtarǵa sáttilik serik bolsyn jáne molshylyq bolsyn degen nıetpen táttiler taratty.
Mereke barysynda Varshavadaǵy “Dımash radıosynda” qazaq mýzykasy men merekesiniń mádenıetin talqylaýǵa arnalǵan arnaıy habar ótti. Polák jankúıerleri Dımashpen kezdesý sátterin asyǵa kútip, aldaǵy konsertterine daıyndyq ústinde.