Qonaqqa Japonıanyń tanymal ánshisi Kodjı Tamakı shaqyryldy
11 qarasha kúni «NHK Music Special» japondyq telebaǵdarlamasynda «Autumn Strong» («Don’t Go») áıgili kompozısıasynyń avtory Kodjı Tamakıge arnalǵan shyǵarylym ótti. Oǵan qazaqtandyq ánshi Dımash Qudaıbergen de qatysty, dep habarlaıdy Almaty-akshamy.kz QazAqparatqa silteme jasap.
Dimashnews.com saıtynyń málimetinshe «NHK Music Special» baǵdarlamasynyń bul kúngi shyǵarylymy rasymen de erekshe boldy. Sebebi qonaqqa Japonıanyń tanymal ánshisi Kodjı Tamakı shaqyryldy. Mýzykant qoǵam arasyna kópten shyqpaı, ıntervú de bermeı kelgen. Japondyq kórermen bul shyǵarylymdy taǵatsyzdana tosty.
Baǵdarlamanyń arnaıy shaqyrylǵan qonaqtary Djekı Chýn men Dımash Qudaıbergen boldy. Qos ánshi de Kodjı Tamakıdiń áıgili «Autumn Strong» («Don’t Go») ánin qytaı tilinde oryndaǵan.
Gonkongtyq ánshi Djekı Chýn atalmysh kompozısıany qytaı tilinde alǵashqy bolyp shyrqady jáne qytaılyq tyńdarman ony úlken qoshemetpen qabyldady.
Keıinnen Djekı Chýnniń oryndaýynan shabyt alǵan Dımash Qudaıbergen bul ándi 2017 jyly Qytaıda «I am Singer» baıqaýy kezinde oryndady. Sodan beri kompozısıa tek Azıa elderinde ǵana emes, sondaı-aq Reseıde jáne Eýropa elderinde tanymal.
«Men Kodjı Tamakıdi ánshi retinde óte syılaımyn. «Don’t Go»-dy tyńdaǵan kezde japon júreginiń tereńdigi, Japonıanyń joǵary mádenıetiniń baılyǵy seziledi. Kodjı Tamakıdiń shyǵarmashylyǵy eshqashan eskirmeıdi jáne áli de jas oryndaýshylarǵa úlken áserin tıgizip keledi. Biregeı shyǵarmashylyǵyńyzdy budan ári de damytyp, tyńdarmandaryńyzdy qýanta beresiz degen úmittemin», - dedi Dımash Qudaıbergen.
Óz kezeginde K.Tamakı qazaqstandyq ánshimen kezdeskenine qýanyshyn bildirdi.
«Dımashtan jyly lebiz estigenime qýanyshtymyn. «Don’t Go»-dyń túrli nusqasy bar. Jáne qaı kezde bolmasyn, bul kompozıany oryndaǵan ánshi, óz jasyna qaramastan, onyń tereńdigin jetkize bildi», - dedi japondyq ánshi.
Aıta keteıik, «NHK Music Special» – ár aı saıyn belgili oryndaýshylar men mýzykanttar shaqyrylatyn tanymal baǵdarlama. Oǵan D.Qudaıbergen qonaq retinde shaqyrylǵanyn buǵan deıin jazǵan bolatynbyz.