AQSH-ta turyp jatqan ánshi esh jerde oqymaıtynyn aıtty
Ótken jyldyń jeltoqsan aıynda ánshi Dımash Qudaıbergen «Bolashaq» halyqaralyq stıpendıasynyń ıegeri atandy. Alaıda ol stıpendıany basqa úmitkerge berýdi jón kórdi, dep habarlaıdy Almaty-akshamy.kz Egemen.kz-ke silteme jasap.
Dımash Qudaıbergen «New York Film Academy» akademıasynda rejıser mamandyǵy boıynsha taǵylymdamadan ótýi kerek edi. Biraq Dımash qazaqstandyq jýrnalıske bergen suhbatynda ol Los-Andjeleste oqý úshin emes, «Tıtanık» fılminiń aty ańyzǵa aınalǵan mýzykasynyń avtory, mýzykalyq prodúser Valter Afanaseffpen án jazý úshin kelgenin aıtty.
«Meniń jeke konserttik qyzmetim bar. Dúnıe júzindegi jankúıerlerimmen kezdesip júrmin. Osynyń bárin oqýmen qalaı úılestiremin dep uzaq oılandym. Kóp adam meni Los-Andjeleste oqıdy dep oılaıdy eken. Men turatyn jerde shoý-bıznes óte qatty damyǵan. Mysaly, men Beıjińde 4 jarym jyl turdym, kóptegen kompozıtorlarmen jumys istedim, qazir AQSH-ta turamyn, biraq esh jerde oqymaımyn.
Tıtanık ánin jáne basqa da kóptegen tanymal ánderdi shyǵarǵan Ýolter aǵaıdy bárińiz biletin shyǵarsyz. Ol - búginde aty ańyzǵa aınalǵan ánderdiń avtory. Sonymen, qazir biz Ýolter aǵaımen jumys istep, án jazýǵa tyrysamyz. Jaqynda barlyqtaryńyz bul ánderdi tyńdaı alasyzdar dep úmittenemin. Jalpy, men qazir tek jumyspen, shyǵarmashylyqpen aınalysamyn», - dedi Dımash Rashıt İlıasovqa bergen suhbatynda.
Dımash Qudaıbergen ózine tıesili «Bolashaq» stıpendıasyn kelesi jyly talantty qazaqstandyqqa tartý etetinin aıtty.