1 mamyrda qazaqstandyq ánshi Dımash Qudaıbergen Erevandaǵy konsertinen keıin jankúıerlerimen kezdesý ótkizip, olardyń suraqtaryna jaýap berdi.
Eske sala ketsek, 28 sáýirde Dımash Qudaıbergen Armenıa astanasy Erevanǵa ushyp baryp, áýejaıdan vıdeo jarıalaǵan edi. Keıin jankúıerlerimen birge túsken sýretterimen de bólisken, dep habarlaıdy Almaty-akshamy.kz QazAqparatqa silteme jasap..
Konsertten keıin jankúıerler Dımash oryndaǵan «Sarerı ovın mernem» armán ánin YouTube arnaǵa jarıalaýdy ótingen.
Fan-kezdesýde Dımashqa birneshe suraq qoıyldy. Sonyń biri ánshi dámin tatyp úlgergen armán taǵamdary týraly boldy.
«Armán káýaptaryna sóz joq. Óte dámdi. Maǵan qatty unady», - dedi Dımash.
Onyń aıtýynsha, armándar - «ózimizge», ıaǵnı qazaqtarǵa uqsaǵan óte qonaqjaı halyq.
Osy oraıda, ol ushaqta armán azamatymen bolǵan qyzyq oqıǵa týraly aıtyp berdi.
«Ushaqta armán azamatymen sóılesip qaldym. Ol keshke ne isteıtinimdi, jumysym qashan aıaqtalatyn surady. Men bilmeımin dep jaýap berdim. Sosyn ol óz telefon nómirin jazyp berip, «kez-kelgen ýaqytta habarlasyńyz, dastarhan jaıyp qoıamyz» dedi. Armándardyń qazaqtar sıaqty qonaqjaı ekenin sonda túsindim», - dep túıindedi ánshi.