Belgıalyq radıo Dımashqa arnalǵan arnaıy baǵdarlama ázirledi.
15 sáýir kúni Belgıanyń AFM radıosynda Dımash Qudaıbergenge arnalǵan eki saǵattyq arnaıy baǵdarlama ótedi, dep habarlaıdy aqshamnews.kz
Bul efırge Dimash Belgian Dears Fan Club klýbynyń dırektory jáne eń belsendi músheleriniń biri retinde Vendı Mrazek pen Ann De Graaf qatysady.
Baǵdarlamanyń júrgizýshisi Sebasten Grate belgıalyq jankúıerlerdiń Dımashqa degen súıispenshiligi jaıly, óneri men erekshe daýysyn álemge tanytýdaǵy umtylystary jaıly áńgime qozǵamaq. Bul efır – jańa tyńdarmandarǵa Dımashtyń shyǵarmashylyǵymen tanysyp, onyń erekshe daýysyna baǵa berýge tamasha múmkindik.
AFM Radio – Belgıanyń Ameı qalasynda (Eno provınsıasy) ornalasqan radıostansıa. Buǵan deıin bul radıostansıada Dımashtyń ánderi shyrqalǵan. Radıo ujymy qazaqstandyq ánshiniń ónerine úlken qyzyǵýshylyq tanytyp, tipti Dımashqa arnalǵan arnaıy baǵdarlama uıymdastyrdy.
Baǵdarlama fransýz tilinde ótedi jáne keıinirek YouTube jelisine júkteledi.
Eske sala keteıik, Dımash Qudaıbergen qarasha aıynda Eýropanyń Berlın, London, Barselona qalalarynda konsert beretinin jazǵan edik.
Sondaı-aq Almatyda 26 mamyr kúni jankúıerlermen kezdesý ótkizedi.