Búgin Almatyda Digital Almaty 2024 forýmy bastalady
Bul dástúrli forým Almaty usynǵan halyqaralyq talqy jáne kórme alańy. Onda sıfrlyq transformasıanyń jańa baǵyty talqylanady, sıfrlyq tehnologıalar salasyndaǵy jaryqqa shyqqan tyń dúnıeler kórmege qoıylady. Kezekti aýqymdy shara Atakentte 1-3 aqpan kúnderi ótkeli tur.
Shara nesimen qyzyq? Álemde sıfrlyq tehnologıanyń jańa tabysy derlik kún saıyn jaryq kóredi. Olar bizdiń ómirimizdi qysqa ýaqyt ishinde ózgertý ústinde. Tipti, bolashaq adamzat qoǵamnyń jalpy beınesi qazirgi jańa jáne sıfrlyq tehnologıalardyń damýyna qaraı qalyptanyp keledi. Eger sizge adamzat bolashaǵy qyzyq bolsa, onda alda kúnderi Atakentte ótetin atalmysh forým da qyzyq bolary sózssiz.
Eń bastysy forýmnyń kórme alańynda álemniń ár túkpirindegi jańa sıfrlyq tehnologıa ónimderi, osy saladaǵy jańa óner tabystary kórsetiledi. Kezekti forým aıasynda qarapaıym adamdar úshin de qyzyqty birqatar sharalar qamtylǵan. Aıtalyq, qarapaıym adamnyń qazirgideı sıfrly álemde jeke basyna tıesili aqparattardy qalaı qorǵaýǵa bolatynyn túsindiretin paneldik sesıa, sonymen birge Qazaqstanda 3D baspalaryn qalaı qurýǵa bolatyny týraly jobalar tanystyrylatyn bolady.
Ótkir taqyryptar alańynda: Digital Almaty 2024 forýy alańynda asa qyzyqty taqly otyrystary kútip tur. Onda sıfrly bolashaqta qandaı mamandardy daıyndaý kerektiginen tartyp, ónerkásipti, úkimet jumysyn, áleýmettik qyzmet kórsetý salalaryn sıfrlandyrýdyń otandyq jáne sheteldik tájirıbeleri, strategıalary sóz bolady. Shyǵarmashylyq ónimderdi, aıtalyq ádebıet pen óner týyndylaryn sıfrly álemde nasıhattaýdyń, qoǵamdyq qundylyqtar men sıfrlyq júıelerdiń úılesimdiligine qatysty jekelegen paneldik otyrystar ótpek.
Almaty Orta Azıa kóshbasshysy retinde: ınovasıalyq tehnologıalar bizdiń tańdaýymyz. Odan bas tarta almaımyz. Barlyq elder ómir súrý sapasyn arttyryp, óndiristi, turmysty jeńildetetin jańa tehnologıalardy, sıfrlyq tehnologıalardy júıeli damytýdy qolǵa aldy. Bul álemdik báıge dese de bolady. Almaty Orta Azıa aımaǵynda atalǵan saladaǵy kóshbasshylyq orynyn qazirden bastap tikteýi kerek. Sıfrlyq transformasıalarǵa arnalǵan Digital Almaty halyqaralyq forýmy osynyń aıqyn qadamy. Joba udaıy ári joǵary deńgeıde jalǵasyn tapsa, bul shahardy alyp geosaıası aımaqtaǵy jańa tehnologıalar bazasyna aınaldyra alady.