Aladop.kz málimetine sáıkes, álemge áıgili fýtbolshy ári kásipker Devıd Bekhemniń basqarýyndaǵy kompanıa Qazaqstannyń elordasy – Astanadaǵy «Jeńis» fýtbol klýbyn satyp alýǵa qyzyǵýshylyq tanytýda, dep habarlaıdy aqshamnews.kz
Bul sheshim Ortalyq Azıadaǵy fýtbol klýbtaryn satyp alýdy josparlaǵan amerıkandyq ınvestorlar tobynyń uzaq ýaqyttan beri talqylap kele jatqan strategıasynyń bir bóligi bolyp tabylady.
«Inter Maıamı» klýbynyń basqarýshy kompanıasynyń Qazaqstandaǵy klýbqa nazar aýdarýyna birneshe sebep bar. Birinshiden, Astana qalasynyń geografıalyq ornalasýy óte qolaıly. Bas shaharǵa álemniń kez kelgen túkpirinen ushaqtar qatynaıdy, bul qalanyń halyqaralyq sporttyq is-sharalar úshin strategıalyq mańyzdy ortalyqqa aınalýyna yqpal etedi.
Ekinshiden, Astanada zamanaýı «Astana arena» stadıonynyń bolýy da mańyzdy faktor. Bul stadıon Chempıondar lıgasy men basqa da halyqaralyq týrnırlerdi ótkizý úshin laıyqty alań bolyp tabylady.
Eń mańyzdy faktorlardyń biri — «Jeńis» fýtbol klýbynyń bolashaqta Chempıondar lıgasyna qatysý múmkindigi. Bul, óz kezeginde, klýbtyń halyqaralyq deńgeıdegi tanymaldylyǵy men qarjylyq turaqtylyǵyn arttyrady.
Qazirgi ýaqytta «Jeńisti» satyp alý boıynsha aýyzsha kelissózder júrgizilip jatqan kórinedi, biraq naqty sheshim men resmı kelisimder áli bekitilmegen. Bul jańalyq qazaqstandyq fýtboldyń bolashaǵy men onyń halyqaralyq arenada tanylýyna úlken áser etýi múmkin.