Kóterilisshilerge qarsy kúres jónindegi álemge áıgili Úndi mektebiniń bazasynda tómen qarqyndylyqtaǵy urys qımyldaryn júrgizý kýrsynan sátti ótken 15 qazaqstandyq desantshy úıine oraldy.
Oqý kýrsy týra eki aptaǵa sozyldy. Oqýdyń 90%-y kúndiz-túni ótkiziletin praktıkalyq sabaqtardan turdy, dep habarlaıdy aqshamnews.kz Qorǵanys mınıstrligine silteme jasap.
– Osy ýaqyt ishinde biz jańa jattyǵýlardy, Jýnglı men taýly jerlerde urys qımyldaryn júrgizýdiń taktıkalyq elementterin zerdeledik. Kúndizgi sabaqtarda drondar, mınadan tazartý úshin robottar belsendi qoldanyldy, al qarańǵy túse, jylýǵa den qoıý kózdeýishi paıdalanyldy, – dedi Desanttyq-shabýyldaý áskerleri qolbasshylysy basqarmasynyń ókili kapıtan Vıtalıı Stefanovıch.
Ofıserdiń aıtýynsha, bul terorızmge qarsy operasıalardy júrgizýdiń tolyq kýrsy boldy. Desanttyq-shabýyldaý áskerleriniń jeke quramy shaǵyn toptardy jergilikti jerdiń ár túrli jaǵdaılarynda qoldanýda aıtarlyqtaı zor tájirıbe aldy.
Desantshylar eń umytylmas sát kúsh-qýat belsendiligi emes, jylandardy, jándikter men túrli ekzotıkalyq ósimdiktermen tamaqtaný arqyly jýnglıde ómir súrý kýrsy bolǵanyn aıtady. Biraq sabaqtardyń negizi tyǵyz ósimdikter men shekteýli kóriný jaǵdaıynda barlaý áreketterin úıretý boldy. Bul blokta desantshylar beıtanys jerdegi áreketterge qaramastan joǵary daǵdylardy kórsete bildi.
Kýrstyń barlyq taqyryptary teorıadan praktıkaǵa josparlanǵan. Aldymen eki saǵat boıy tyńdaýshylar teorıany, is-árekettiń erekshelikterin zerdelep, sodan keıin mekteptegi oqý-jattyǵý bazasynda jattyqty. Sosyn túngi jaǵdaıda emtıhan tapsyrdy. Eger kúndiz nusqaýshylar desantshylardyń is-áreketterin usyna nemese túzete alsa, onda olar emtıhanda tek baqylaýshy retinde áreket etti.
Kýrs sońynda barlyq desantshylarǵa sertıfıkattar men estelik syılyqtar tabystaldy.
Esterińizge sala keteıik, Qazaqstan men Úndistan uzaq ýaqyt boıy áskerı yntymaqtastyq is-sharalaryn, eń aldymen qazaqstandyq tarapty bitimgerlik qyzmetke daıyndaý sheńberinde júzege asyryp keledi.
Sonymen qatar, elder terorızmge qarsy kúreste ekijaqty yntymaqtastyqty tereńdetýde. Qazan aıynda Úndistanda «QazÚndi-2024» oqý-jattyǵýy ótti. Oǵan Desanttyq-shabýyldaý áskerleri men «Ońtústik» óńirlik qolbasshylyǵynyń áskerı qyzmetshileri qatysty. Desanttaý kezende qazaqstandyq áskerı qyzmetshiler úndilik áriptesterimen birlesip, taýly jerde qıyn jaǵdaıda 3500 metr bıiktikten shekteýli alańǵa parashútpen sekirdi.
Turaqty birlesken áskerı oqý-jattyǵýlary men oqytý kýrstaryn ótkizý Úndistan men Qazaqstannyń beıbitshilikti, turaqtylyq pen óńirlik qaýipsizdikti nyǵaıtý salasyndaǵy ózara múddelestigin kórsetedi.