Ushý jyldamdyǵy saǵatyna 180 shaqyrym, bıiktik – 800 metr
Desanttyq-shabýyldaý áskerleriniń áskerı qyzmetshileri áskerı-kóliktik avıasıa ushaqtarynan parashútpen sekirý tásilderin pysyqtady, dep habarlaıdy Almaty-akshamy.kz.
Bul sharaǵa Almaty, Qonaev jáne Jetisý garnızondarynyń 200-den astam ofıseri men kelisimshart boıynsha áskerı qyzmetshisi tartyldy. Áskerı-kóliktik avıasıanyń S-295 ushaǵynan sekirý uzaq úzilisten keıin alǵash ret júrgizilip otyrǵanyn aıta ketý kerek.
Desanttyq-shabýyldaý áskerleri qolbasshysy basqarmasynyń áýe-desanttyq qyzmetiniń ofıserleri jeke quramǵa ushaqtan parashútpen sekirýdi uıymdastyrý men sekirý boıynsha nusqaýlyq-ádistemelik sabaqtar ótkizdi. Onda sekirý elementterin jerde pysyqtaý men parashút júıelerin kezeń-kezeńimen tóseý de júzege asty.
Áskerlerdiń qolbasshysy, general-maıor Almaz Jumakeev desantshylarǵa tán naǵyz erliktiń neden quralatynyn atap ótti.
– Kez kelgen adam parashútpen sekirerde úreıge boı aldyrady Biraq biz, desantshylar, bul úreıdi eńsere otyryp, júktelgen tapsyrmany naqty oryndaı alatynymyzben erekshelenemiz. Erjúrektilik degen, mine, osy, – dedi general-maıor Almaz Jumakeev.
Desanttyq-shabýyldaý áskerlerine 2017 jyldan keıin kelgen ofıserler men kelisimshart boıynsha áskerı qyzmetshilerdiń kópshiligi S-295 ushaǵynan birinshi ret sekirip otyr.
– Áskerı-kóliktik avıasıa ushaǵynan parashútpen sekirýge tikushaqtan keminde bes ret sekirgen áskerı qyzmetshiler ǵana jiberiledi. Sondyqtan merzimdi qyzmettiń sarbazdary buǵan qatyspaıdy, – dep túsindirdi Desanttyq-shabýyldaý áskerleri qolbasshysynyń orynbasary, polkovnık Nurmahan Qudaıbergenov.
Áskerı-kólik avıasıasynyń ushaǵynan sekirý joǵary kúrdeliligimen erekshelenedi. Ushý jyldamdyǵy saǵatyna 180 shaqyrym, bıiktik – 800 metr. Munyń bári jeke quramnan arnaıy daıyndyq pen daǵdyny talap etedi.
Mı-17 jáne Mı-8 tikushaqtarynan, ádette, vzvodty sekirtý júrgizilse, al S-295 ushaǵyn qoldana otyryp, sekirýde bul san rotaǵa deıin artady. Óz kezeginde bul aýqymdy jaýyngerlik mindetterdi oryndaýǵa molynan múmkindik beredi.