Qazaq ulttyq qyzdar pedagogıkalyq ýnıversıtetinde joǵary bilim berý júıesiniń ózekti máselelerine arnalǵan mańyzdy basqosý ótti.
«Joǵary bilim berýde derekterge negizdelgen sheshim qabyldaý: ınstıtýsıonaldyq zertteýlerdegi qazirgi máseleler men bolashaq baǵyttar» atty Qazaqstandaǵy ınstıtýsıonaldyq zertteýler boıynsha III forýmdy QyzPU men elimizdiń jetekshi joǵary oqý oryndary — Nazarbayev University, KIMEP University jáne SDU University birlesip uıymdastyrdy, dep habaralaıdy aqshamnews.kz.
İs-sharaǵa sarapshylar, zertteýshiler jáne bilim berý uıymdarynyń ókilderi jınaldy. Jıyn barysynda bilim berý salasyndaǵy sheshimderdi derekterge súıene otyryp qabyldaý qajettigi, sapany arttyrý joldary, halyqaralyq tájirıbeni engizý máseleleri keńinen sóz boldy. Forým aıasynda qatysýshylarǵa úzdik halyqaralyq tájirıbeler, analıtıkalyq júıeler men sıfrlyq quraldardy engizýdiń naqty mysaldary usynyldy.
QyzPU Basqarma Tóraǵasy – Rektory Gúlmıra Qanaı forýmnyń joǵary bilim berý júıesin jańǵyrtýdaǵy mańyzyn atap ótti.
«Búgingi forýmda sala sarapshylary bas qosyp, stýdentterge kórsetiletin qyzmet sapasyn arttyrý múmkindikteri talqylandy. Sondaı-aq joǵary bilim berý júıesiniń bolashaǵyna yqpal etetin sheshimder qabyldaýdaǵy óz rólimiz qandaı bolmaq degen mańyzdy suraqtar kóterildi. Aldaǵy ýaqytta elimizdiń árbir ýnıversıtetinde osyndaı analıtıkalyq zertteýler negizinde mańyzdy basqarý sheshimderi qabyldanyp, joǵary oqý oryndarynyń halyqaralyq standarttarǵa saı transformasıalanýyna múmkindik týatynyna senim bildiremiz», – dedi rektor.
Forýmda bilim sapasyn arttyrý úshin derekterdi jınaý men taldaýdyń zamanaýı ádisteri, sıfrlandyrýdyń ınstıtýsıonaldyq zertteýlerdegi róli, sondaı-aq kadrlyq jáne ádistemelik máseleler keńinen talqylandy. Nazarbaev Ýnıversıtetiniń Instıtýsıonaldyq zertteýler jáne analıtıka bóliminiń basshysy Mettú Kortnı: «Derekter – sanaly sheshim qabyldaýdyń basty quraly. Bul forým – ýnıversıtetterdiń tájirıbe almasýy men bilim berý sapasyn jańa deńgeıge kóterýdiń naqty alańy», – dep atap ótti.
Forýmnyń ereksheligi – teorıalyq bólimmen qatar, praktıkalyq oqytý sesıalarynyń ótkizilýi boldy. Microsoft kompanıasynyń mamandary Excel baǵdarlamasyn basqarý men derek taldaý quraly retinde tıimdi qoldaný tásilderin úıretti. SDU University Sapa monıtorıńi departamentiniń dırektory Gýlnaz Togýzbaeva forýmnyń qoldanbaly mańyzyn atap ótti.
«Bul is-shara Qazaqstandaǵy joǵary bilim berý salasy úshin óte mańyzdy. İs-sharanyń basty maqsaty – joǵary bilim berý salasynda sheshim qabyldaý úshin derekterdi tıimdi paıdalaný. Qazirgi tańda ýnıversıtetterdiń sanaly sheshim qabyldaýy úshin naqty maqsattar qoıyp, uzaq merzimdi jetildirý jolynda naqty derekterge súıenýi qajet», – dedi ol.
Qatysýshylar úshin pikirtalas alańy kásibı oı bólisýdiń, bilim berý analıtıkasyn damytýdaǵy ózekti máselelerdi birlesip sheshýdiń tıimdi alańyna aınaldy. Forým joǵary bilim berýdi derekter negizinde basqarýdyń keleshegine baǵyttalǵan naqty qadam retinde baǵalandy.