Depýtat, bloger Dáýlet Muqaev ınstagram paraqshasyna vıdeo jarıalady.
Dáýlet Muqaevtiń suraǵyna jaýap bergen depýtattar qandaı kitap oqyp júrgenin aıtty, dep habarlaıdy Almaty-akshamy.kz
Halyq qalaýlylary oqyǵan kitaptardyń ishinde "Mahabbat, qyzyq mol jyldardan" bastap shetel ádebıetine deıin bar.
"Áleýmettik-mádenı damý komıtetiniń depýtattary Qaraǵandy oblysyna jolǵa shyqty. Juma qabyl bolsyn. Al sizdiń sońǵy oqyǵan kitabyńyz qandaı?" - dep jazdy Dáýlet Muqaev.
Janarbek Áshimjanov Floberdiń "Bovarı hanymyn", Berezovskııdiń "Memýaryn", Nurlan Áýesbaev Tórehan Maıbastyń "Qurmaldyq" degen kitabyn oqyǵanyn, Aına Mysyrálimova İlıas Esenberlınniń "Kóshpendiler" kitabyn qaıtalap oqyp jatqanyn, Nurgúl Taý Loretta Broınıng "Baqyt gormondary", Asqat Aımaǵambetov Erıh Marıa Remarktiń "Trıýmfalnaıa arka" kitabyn oqyǵanyn, Juldyz Dosbergenqyzy Rahat Mamyrbektiń "Ult týraly armanyn" aıaqtap, Fransıs Fýkýıamanyń "Lıberalızm jáne oǵan aıtylatyn syn" atty kitapty oqyp jatqanyn, Rınat Zaıytov Tursyn Jurtbaıdyń "Alash qozǵalysy" kitabyn aıaqtap, Sanjar Kerimbaı qurastyrǵan "Qýys keýde" atty kitapty oqyp jatqanyn aıtsa, Gúldara Nurymova "Mahabbat, qyzyq mol jyldardy" oqyǵanyn, Nartaı Aralbaıuly Oralhan Bókeıdiń "Ataýkeresin", al Ardaq Nazarov "Qutty bilikti" oqyp, qundy oılardy jattap jazyp jatqanyn aıtty. Suraq qoıýshy Dáýlet Muqaevtyń ózi Hararıdiń "Sapiens" kitabyn oqyǵanyn aıtty.