Qos palatanyń jumysy qorytyndylandy.
Parlament depýtattary kanıkýlǵa ketti, dep habarlaıdy Almaty-akshamy.kz
Májilis spıkeri Erlan Qoshanov Parlament palatalarynyń birlesken otyrysynda VIII sesıanyń jumysyn qorytyndylady.
«Byltyr Qazaqstan halqy Búkilhalyqtyq referendýmda Prezıdent reformalaryn qoldady. Elimizdiń jańarǵan Konstıtýsıasy búkil memlekettik júıe boıynsha aýqymdy ózgeristerge jol ashty. Sýperprezıdenttik júıeden prezıdenttik respýblıka úlgisine kóshtik. Parlamenttiń róli men mártebesi kúsheıdi. El basqarý isine halyqtyń atsalysý belsendiligi arta tústi. Osyǵan deıin uzaq ýaqyt boıy opozısıada bolǵan partıa Parlamentke ótti. Bul jolǵy saılanym Qazaqstan tarıhyndaǵy eń kóp partıaly Parlament bolyp otyr. Májilis túrli kózqarastar men saıası kúshter toǵysqan alańǵa aınaldy. Halyq qalaýlylarynyń jańa tolqyny keldi. Májilis quramy uzaq jyldan beri alǵash ret bir mandatty okrýgten saılanǵan shynaıy ári tartysty básekede ozyp shyqqan depýtattarmen tolyqty», - dedi Erlan Qoshanov.
Senat pen Májilis depýtattary tıisti qaýlyny qabyldady.