Májilis depýtaty Dáýlet Turlyhanov elimizde medısına qyzmetkerleriniń tapshylyǵy týraly aıtty, - dep habarlaıdy Aqshamnews.kz tilshisi.
Ol bul másele boıynsha saýalyn densaýlyq saqtaý mınıstri Aqmaral Álnazarovaǵa joldady.
"2024 jyldyń qorytyndysy boıynsha Qazaqstanda 3 954 dáriger jetispeıdi. Sondaı-aq, orta býyn medısına qyzmetkerleriniń arasynda 4 505 adam tapshy", - dedi depýtat.
2025 jylǵy 1 qańtarǵa qaraı densaýlyq saqtaý salasynda shamamen 275 myń maman jumys isteıdi: olardyń 83 myńnan astamy dáriger, al 191 myńǵa jýyǵy – orta medısına qyzmetkerleri.
Alaıda soǵan qaramastan, kadr tapshylyǵy máselesi sheshilmeı otyr. Tapshy mamandar qatarynda terapevter, jalpy praktıka dárigerleri, pedıatrlar, akýsher-gınekologtar, hırýrgter men anestezıolog-reanımatologtar bar.
"Mysaly, Qostanaı oblysynda 2025 jyldyń alǵashqy jartyjyldyǵynda 326 maman jetispeıdi. Osyndaı jaǵdaı Aqmola, Jambyl jáne Túrkistan oblystarynda da baıqalady", – dedi Turlyhanov.