13 qazanda Abaı atyndaǵy Qazaq ulttyq opera jáne balet teatrynyń sahnasynda álemge tanymal opera ánshisi, Tatarstan Respýblıkasynyń halyq ártisi, Reseı Federasıasynyń eńbek sińirgen ártisi, Gabdýlla Týkaı atyndaǵy Tatarstan Memlekettik syılyǵynyń laýreaty Albına Shaǵımuratova jáne Mıhaıl Ivanovıch Glınka atyndaǵy halyqaralyq vokalıster baıqaýynyń laýreattary qatysatyn konsert ótedi.
Konsert Albına Shaǵımuratova men baıqaý jeńimpazdarynyń halyqaralyq gastróldik týry aıasynda uıymdastyrylyp otyr. Týrdyń maqsaty – 2024 jylǵy baıqaý jeńimpazdarynyń shyǵarmashylyǵyn Qazaqstan, Ózbekstan, Túrkıa, Reseı, Armenıa jáne Belarýs kórermenderine tanystyrý.
Ánshi atap ótkendeı, Qazaqstan bul aýqymdy týrdyń mańyzdy bóligi bolyp tabylady. Týr áıgili opera juldyzy, baıqaýdyń negizin qalaýshy ári ony 40 jyldan astam ýaqyt basqarǵan Irına Arhıpovanyń 100 jyldyǵyna arnalǵan.
«Bul gastrólder – biz úshin Alma-Atyny, Astanany jáne Qazaqstandy jaqynyraq tanyp-bilýge, jańa mádenıet pen kórermendermen júzdesýge tamasha múmkindik. Mundaı shyǵarmashylyq baılanystar tek mýzyka álemi úshin ǵana emes, jalpy ómirimiz úshin de asa mańyzdy», – deıdi Albına Shaǵımuratova.
Kesh baǵdarlamasynda álemdik opera klasıkasynyń jaýharlary — V. A. Mosart, Dj. Verdı, V. Bellını, G. Donısettı, Dj. Rossını, A. Borodın, N. Rımskıı-Korsakov, I. Stravınskıı jáne basqa da kompozıtorlardyń týyndylary oryndalady.
Shaǵımuratovanyń erekshe tembrli daýysy men sheberligi ony álemniń jetekshi sahnalarynda — Kovent-Garden, La Skala, Vena memlekettik operasy, Metropolıten-opera jáne Bavarıa opera teatrlarynda zor qoshemetke bóledi. Qazaqstandyq kórermenderge ánshi V. Bellınıdiń «Norma» operasyndaǵy ataqty «Casta diva» kavatınasyn jáne Dj. Verdıdiń «Otello» operasyndaǵy Dezdemona arıasyn usynady.
Sonymen qatar sahnada:
- Ekaterına Savnıkova (III syılyq, soprano),
- Ekaterına Lýkash (I syılyq, messo-soprano),
- Ózbekstannyń eńbek sińirgen ártisi Otabek Nazırov (I syılyq, tenor),
- Konstantın Fedotov (II syılyq, bas),
- Kırıll Popov (dıplomant, tenor) óner kórsetedi.
- Sımfonıalyq orkestrdi Tatarstannyń halyq ártisi, maestro Renat Salavatov basqarady.
- Keshtiń fınalynda Dj. Verdıdiń «Travıata» operasyndaǵy ataqty «Zastolnaıa» oryndalyp, ony Albına Shaǵımuratova jas oryndaýshylarmen birge oryndaıdy.
Maestro Renat Salavatov atap ótti:
«Bul – erekshe mádenı oqıǵa. Bizdiń sahnada bedeldi Glınka baıqaýynyń laýreattary óner kórsetedi. Olar kórermen men qazylardyń júregin jaýlap, álemge jol tartqan jas daryndar. Albına Shaǵımuratovaǵa alǵys bildiremin — ol tek álem sahnalarynda óner kórsetip qana qoımaı, baıqaýdyń kórkemdik jetekshisi retinde bolashaq opera juldyzdaryn tanystyrýǵa úles qosýda.»
Konsert kúni: 2025 jylǵy 13 qazan
Bastalý ýaqyty: 19:00
Ótetin orny: Abaı atyndaǵy Qazaq ulttyq opera jáne balet teatry