Májilis depýtaty bul týraly Facebook-paraqshasynda jazǵan.
Asqat Aımaǵambetov jazbasynda osteoporoz jaıdy sóz qozǵaǵan, dep habarlaıdy aqshamnews.kz.
"Osteoporoz – tym kesh eske alatyn dert. Kúndelikti áńgimede de bul taqyryp kóp qozǵalmaıdy. Biraq shyn máninde bul aýrý 50 jastan asqan mıllıondaǵan áıeldiń ómirine keri áser etip otyr. Osteoporoz – jaı ǵana súıektiń álsizdigi emes. Ol aıaq-qoldyń synýy, operasıalar, uzaq ońaltý kezeńi. Keıde adam tipti júrip-turý múmkindigin joǵaltyp, ózge bireýdiń kómegine táýeldi bolyp qalady. DDSU derekteri boıynsha, 50 jastan asqan árbir úshinshi áıeldiń súıegi osteoporoz saldarynan synady", – dedi Aımaǵambetov.
The Guardian basylymy Ulybrıtanıada árbir ekinshi áıel osy derttiń saldarymen betpe-bet keletinin jazady.
Japonıa, Koreıa, Fransıa, Shvesıa sekildi elderde bul másele áldeqashan eskerilgen. Iaǵnı, osteoporozǵa skrınıng ulttyq densaýlyq saqtaý baǵdarlamasyna kirgizip qoıǵan.
"Al Qazaqstanda, ókinishke qaraı, bul taqyryp áli de nazardan tys qalyp otyr. Sondyqtan biz Densaýlyq saqtaý mınıstrligine arnaıy usynys joldadyq: 50 jastan asqan áıelderge osteoporozǵa skrınıng engizý kerek dep. Bul jaı qaǵaz júzindegi sheshim emes. Bul degenimiz analarymyzdyń, ájelerimizdiń, muǵalimder men dárigerlerdiń – ómirin ózgege arnaǵan áıelderdiń densaýlyǵy týraly", – dep jazdy ol.
Depýtat bul skrınıngti ulttyq skrınıng tizimine engizý úshin jumys júrgizip jatyrǵanyn jetkizdi. Ol Densaýlyq saqtaý mınıstrligi bul usynysty qoldaıdy dep úmittenetinin málimdedi.