Baıqaý 25 aqpanda bastalyp, 15 naýryzǵa deıin jalǵasady.
Densaýlyq saqtaý mınıstrligi «Deni saý ult» - árbir azamat úshin sapaly jáne qoljetimdi densaýlyq saqtaý» ulttyq jobasynyń úzdik logotıpine baıqaý jarıalaıdy, dep habarlaıdy Almaty-akshamy.kz QR Densaýlyq saqtaý mınıstrliginiń baspasóz qyzmetine silteme jasap.
Ulttyq jobanyń grafıkalyq sımvoly densaýlyq saqtaý, dári-dármekpen qamtamasyz etý, epıdemıologıalyq salaýattylyq jáne salaýatty ómir saltyn ilgeriletý máselelerine jurtshylyqtyń nazaryn aýdarý jónindegi jalpy memlekettik mindetti iske asyrýǵa qyzmet etedi.
Shyǵarmashylyq konkýrsqa qatysýǵa dızaın jáne grafıkalyq óner daǵdylaryn meńgergen zańdy jáne jeke tulǵalar shaqyrylady. Sonymen qatar, konkýrstyq jumystar jeke de, ujymdyq ta bolýy múmkin.
Baıqaý 25 aqpanda bastalyp, 15 naýryzǵa deıin jalǵasady, ol eki kezeńnen turady: irikteý jáne baǵalaý. Konkýrsqa qatysý óteýsiz negizde júzege asyrylady jáne jumysqa qosa beriletin ótinimmen resimdeledi. Baıqaý jumystary elektrondy túrde poshtaǵa qabyldanady: zdrav_logo@gmail.com
Konkýrsqa usynylǵan jumystarǵa qoıylatyn talaptar: túpnusqalylyq, beıneler men oıdyń bolýy, qabyldaý men beıneleýdiń jeńildigi, este saqtalýy, tústerdiń mınımýmy, aýqymdylyǵy, ulttyq sımvolıka elementterin yqtımal paıdalaný.
Logotıpter elektrondy formatta (JPG, GIF, PNG) 300 dpi ruqsatymen, jumys faılyn mindetti túrde usynýmen, kóldeneń jáne tik buryshtarda berilý kerek.
Quzyretti qazylar alqasy baıqaý taqyrybyna, sújettiń biregeıligine, oryndaý sheberligine jáne kórkemdik qundylyǵyna sáıkes baǵalaıdy. Týyndylardyń túpnusqasy ǵana qarastyrylady, ózgeniń logotıpterin nemese onyń elementterin kóshirýge jol berilmeıdi.
Jumystar 2022 jyldyń 15 naýryzyna deıin qabyldanady. Komısıa iriktegen úzdik logotıp «Deni saý ult» ulttyq jobasynyń turaqty grafıkalyq sımvoly retinde áleýmettik jelilerde, BAQ-ta, barlyq taratylatyn aqparattyq-ımıdjdik ónimderde jáne basqa da tasymaldaǵyshtarda ornalastyrý úshin paıdalanylatyn bolady.
«Deni saý ult» ulttyq jobasy 2025 jylǵa deıin tórt baǵytty iske asyrýdy kózdeıdi:
birinshi - medısınalyq kómektiń qoljetimdiligi men sapasyn arttyrý;
ekinshi - epıdemıologıalyq boljaýdyń jáne bıologıalyq qaterlerge den qoıýdyń qazirgi zamanǵy júıesin qalyptastyrý;
úshinshi - halyqty otandyq dárilik zattarmen jáne medısınalyq buıymdarmen qamtamasyz etý;
tórtinshi - halyq arasynda salaýatty ómir salty men buqaralyq sportty nasıhattaý.