Sarbazdar úılerine jol tartty
Otan aldyndaǵy áskerı boryshyn óteý – árbir erdiń azamattyq boryshy. Ulttyq ulannyń Almaty qalasynda ornalasqan 5571 áskerı bólimi bir jyl boıy áskerı qyzmetin ótegen sarbazdardy áskerı mindettilikten bosatyp, otbasylaryna saltanatty túrde shyǵaryp saldy.
Atalǵan áskerı bólimde 2023 jyldyń ekinshi shaqyrylymy boıynsha ózge oblystardan kelgen 600-den astam jaýynger Otan aldyndaǵy boryshtaryn abyroımen atqardy.
– Sizder óz mindetterińizdi adal oryndap, batyldyq tanyttyńyzdar, áskerı qyzmettiń barlyq aýyrtpalyǵyn tabandylyqpen kóterdińizder. Elimizdiń alǵa ustasa – aıbary, qolǵa ustasa naızasy sizdersizder! Osy áskerı ómirden alǵan tálim-tárbıelerińiz aldaǵy azamattyq ómirlerińizge septigin tıgizetinine senimdimin, – dedi brıgada komandıri polkovnık Maqsat Baımaǵulov.
Bul kúni jaýyngerler úshin óz úıindeı bolyp ketken kazarmanyń aldyndaǵy alańǵa áskerı bólimniń barlyq jeke quramy saltanatty sap túzep, is-sharaǵa tolyq qatysty. Sap túzegen alańnyń aldyńǵy shebiniń qarsy betindegi minberde áskerı bólimde uzaq jyl eńbek etip zeınetke shyqqan azamattar da turdy. Olardyń barlyǵy da óz úılerine attanǵaly turǵan sarbazdarǵa sát-sapar tilep, aqjoltaı nıetterin jaýdyrdy.
Sonymen qatar, Ulttyq ulan jaýyngerleri qoǵamdyq tártipti qadaǵalaý qyzmetinde Polısıa departamentiniń ókilderimen tize qosa eńbek etetindikten, quqyq qorǵaý organdarynyń jetekshileri de qyzmet barysynda ózin úlgili etip kórsetken sarbazdardy marapattaýǵa kelgen bolatyn.
Atap aıtqanda, qala kóshelerindegi qoǵamdyq tártipti qamtamasyz etý barysynda aıryqsha qyraǵylyǵymen kózge túsken sarbazdarǵa qolbasshysy general-maıor Talapker Ámireev pen bólim komandıri polokvnık Maqsat Baımaǵulovtyń atynan Alǵys hat, komandırlik saǵat syndy baǵaly syılyqtar jáne áskerı bólimniń jazylyp qoıylǵan Jaýyngerlik týy janynda estelikke túsken sýretteri tabys etildi.
Sondaı-aq, jıyn aıasynda ardagerler atynan sóz alǵan zapastaǵy maıor Berik Almaǵambetov jalyndy tilegin jetkizip, qyzmetinde biliktiligimen erekshe kózge túsken jaýyngerlerge «Otan qorǵaýshynyń anasy» tós belgisin tabystady.