Sıfrlyq valúta alǵash ret óziniń tarıhı rekordyn jańartyp, 90 myń dollarlyq mejeni eńserdi, dep habarlaıdy aqshamnews.kz
Bul ósý qarqynyn kóptegen sarapshylar Donald Tramptyń AQSH prezıdenti bolyp saılanýymen baılanystyrady. DW habarlaýynsha, Tramp saılaý aldyndaǵy kampanıasynda maınıng pen krıptovalúta aınalymyna retteýdi engizbeıtinin ýáde etti.
Frankfýrt qarjy jáne menedjment mektebiniń blokcheın ortalyǵynyń dırektory Ko-Per Georg atap ótkendeı, AQSH-tyń baǵaly qaǵazdar jáne bırjalar jónindegi komısıasy (SEC) jaqynda bıtkoınge ınvestısıa jasaıtyn 11 bırjalyq qordyń (ETF) iske qosylýyn maquldady.
Georgtyń pikirinshe, SEC basshysy Gerı Gensler krıptovalúta aınalymyn retteýge nıetti bolǵanymen, Tramp komısıanyń qurylymyn qaıta qarastyrýǵa umtylady.
Digital Euro Association basshysy Ionas Gross bıtkoınnyń jańa aktıv klasy retinde bedelin nyǵaıtqanyn aıtady.
«Birqatar zeınetaqy qorlary bıtkoınǵa ınvestısıa salýdy bastady, jáne meniń oıymsha, sýverendik qorlardyń bul bastamaǵa qosylýy ýaqyt máselesi ǵana. Sol kezde krıptovalúta naryǵy múldem jańa deńgeıge shyǵady», — dep boljaıdy Gross.
The Pragmatic Investor ınvestısıalyq kompanıasynyń bas ekonomısi Djeıms Ford krıptovalúta baǵasynyń 102 000 dollarǵa deıin ósýin kútýde jáne bul kórsetkishke 2024 jyldyń aqpan aıyna deıin jetetinin aıtady.