Qazaqstan ózge elderge úlgi boldy.
Dúnıejúzilik densaýlyq saqtaý uıymy Almaty oblysy Eńbekshiqazaq aýdanaralyq kóp salaly aýrýhanasy bazasynda alǵashqy medısınalyq-sanıtarlyq kómek kórsetý boıynsha óziniń demonstrasıalyq platformasyn ashty, dep habarlaıdy Almaty-akshamy.kz.
Bul týraly DDSU ókilderi men Ózbekstannyń medısına salasy mamandarynyń oblysqa arnaıy kelgen sapary barysynda belgili bolǵan.
«Oblys ákimi Qanat Bozymbaev mundaı platforma úshin Almaty oblysynyń tańdap alynýy halqynyń 78% aýyldyq jerde turatyn óńir úshin asa mańyzdy ekenin atap ótti. Jańa nysan alǵashqy medısınalyq kómek sapasyn arttyrýmen qatar óńirdi joǵary bilikti mamandarmen qamtýǵa da óz septigin tıgizetinine senim bildirdi», - delingen Almaty oblysy ákiminiń baspasóz qyzmetiniń habarlamasynda.
DDSU Eýropalyq óńirlik búrosynyń dırektory Hans Klýge óz sózinde jańa platformanyń artyqshylyqtaryna toqtaldy.
«Qazaqstan – DDSU qoldap-qýattaǵan Demonstrasıalyq platformany ashyp jatqan bizdiń aımaqtaǵy alǵashqy el. Bul turǵyda Qazaqstan ózge elderge úlgi boldy. Sózden iske kóship, búgin ortalyq qalalarda emes, shet óńirde mańyzdy jobany iske asyryp otyrmyz. Osy platforma arqyly memleketter alǵashqy kómek kórsetýdiń ozyq úlgilerin bir-birinen úırenip, ózara tájirıbe almasady. Kovıd indeti bizge neǵurlym myqty, beıimdelgen, qajetti resýrstarmen qamtylǵan alǵashqy medısınalyq kómek júıesin qalyptastyrý kerek ekenin kórsetip berdi. Sondyqtan bul platformanyń mańyzy zor», - dedi H.Klýge myrza.
Densaýlyq saqtaý mınıstri Ajar Ǵınaıattyń aıtýynsha, osy alańnyń Qazaqstanda qurylýy elimizdegi alǵashqy medısınalyq-sanıtarlyq kómektiń damyǵanyn aıǵaqtaıdy. Qazaqstannyń bul tájirıbesin oblysqa saparlap kelgen Ózbekstan delegasıasy da óz elinde engizýge nıettenip otyr.
«Biz Eńbekshiqazaq aýdanyndaǵy aýrýhana sıaqty uıymdardyń ozyq ınovasıalyq tehnologıalardy qoldanýdaǵy tájirıbesi men jetistikteriniń keń taralýyna barynsha múmkindik jasaımyz», - dedi Ajar Ǵınaıat.
Eńbekshiqazaq aýdanaralyq kóp salaly aýrýhanasynyń bazasynda ashylyp otyrǵan platformanyń ereksheligi sol – buryn alǵashqy medısınalyq-sanıtarlyq kómekte syrqattyń jarasyn tańyp, dárisin egip, járdemin berse, qazir dáriger mamandardyń janyna áleýmettik qyzmetshiler men psıhologtar da qosylyp otyr. Iaǵnı alǵashqy kómek prosesi keshendi túrde qarastyrylady. Munda ana men balanyń densaýlyǵyna, otbasyn josparlaýǵa, aýrýdyń aldyn alýǵa, dári-dármekpen der kezinde qamtamasyz etýge erekshe mán beriledi.