Almaty oblysynda bolǵan kókpar oıyny kezinde túsirilgen qandy vıdeo áleýmettik jelide rezonans týdyrdy, - dep habarlaıdy Aqshamnews.kz tilshisi.
Vıdeoda kókpar oıyny kezinde attyń aýyzynan qan aǵyp jatqan sát kórinedi. Bul kadrlardan keıin kóptegen qoldanýshy kókpardy «qatygez sport» dep atap, ony múlde toqtatýdy talap etip jatyr.
Ne boldy?
Oqıǵa Qarasaı aýdanyndaǵy at klýbtarynyń birinde bolǵan. Jelide taraǵan vıdeodan keıin adamdar İshki ister mınıstrligine e-Otinish portaly arqyly jappaı shaǵym túsirdi. Sonymen qatar, atalǵan klýbtyń 2GIS qosymshasyna jeli qoldanýshylary teris pikirler jaýdyrdy. Klýbtyń reıtıńi 4,9 juldyzdan 1,3-ke deıin tómendedi. Klýb ókilderi jaraqattyń aýyr emestigin aıtyp, «kórgenderge jaı shamadan tys kórindi» dep túsindirdi.
sýret: jeliden
Federasıanyń jaýaby
Qazaqstan kókpar federasıasynyń prezıdenti Aıdarbek Hodjanazarov oqıǵaǵa attyń durys daıyndalmaýy men jabdyqtyń talapqa saı bolmaýy sebep bolǵanyn aıtty.
"Mundaı jaraqattar kóbine daıyndyqtyń durys júrgizilmeýi men jabdyq sapasynyń tómendiginen bolady. Bul tek kókparǵa tán emes, ózge at sporty túrlerinde de kezdesedi. Sondyqtan búkil kókpardy aıyptaý durys emes, naqty jaǵdaıdy zertteý kerek", – dedi ol.
Federasıa basshysy kóptegen beıresmı jarystar erejeni saqtamaı ótkiziletinin atap ótti:
"Biz mundaı oqıǵalardy muqıat tergep, uıymdastyrýshylar jaýapkershilikke tartylýy kerek dep sanaımyz" dedi ol.
Aıdarbek Hodjanazarov federasıa qaýipsizdik standarttaryn jańartyp jatqanyn jáne kókpardy barynsha qaýipsiz etýge kúsh salatynyn jetkizdi:
"Kókpar - ulttyq sport jáne mádenıetimizdiń bir bóligi. Mindetimiz - dástúrdi saqtaı otyryp, oıyndardy zamanaýı ári qaýipsiz etý", - dep qosty maman.
Tergeý júrip jatyr
Almaty oblystyq polısıa departamenti bul jaǵdaı boıynsha tekserý bastalǵanyn habarlady.