Almaty ákimi Darhan Satybaldy jumys sapary aıasynda qaladaǵy iri óndiristik kásiporyndardy – «Nobel AFF» AQ, «Saıman korporasıasy» JSHS jáne «Evrazıan Fýds Korporeıshn» AQ zaýyttaryn aralady, - dep habarlaıdy Aqshamnews.kz tilshisi.
«Nobel Almaty farmasevtıkalyq fabrıkasynda» ákim kompanıanyń ónimderimen jáne Almaty Indýstrıaldyq aımaǵynda salynatyn jańa joǵary tehnologıalyq dári-dármek zaýytynyń qurylys josparymen tanysty.
Ony 2027 jylǵa deıin salý josparlanǵan. Joba 2020 jyldyń qyrkúıeginde ınvestordyń QR Densaýlyq saqtaý mınıstrligi jáne «SK-Farmasıa» JSHS-men jasaǵan memorandýmy aıasynda júzege asyrylady.
Jańa zaýytta 5 óndiristik seh pen 3 zerthana ornalastyrý kózdelgen. Budan bólek, qoıma, keńse jáne ákimshilik ǵımarattar, sondaı-aq ınjenerlik-qosalqy nysan qarastyrylǵan. Qurylysty 2026 jyly bastaý josparlanyp otyr.
Ákim ınvestorǵa barlyq qajetti qoldaý kórsetýdi tapsyrdy. Jańa zaýyt ónim assortımentin keńeıtýge, joǵary tehnologıalyq dárilerdi óndirýge jáne barlyq óndiristi qala syrtyna – Indýstrıaldyq aımaqqa kóshirýge múmkindik beredi.
«Saıman korporasıasynda» Darhan Satybaldy esepke alý aspaptary óndirisiniń joǵary deńgeıin atap ótti. Kásiporynda 180 adam eńbek etedi, olardyń basym bóligi – jergilikti JOO túlekteri. Kásiporynnyń jobalyq qýaty – jylyna 800 myń aspap, al jyl saıynǵy naqty óndiris kólemi – 500 myń dana.
Ákim qala kásiporyndarynda qazaqstandyq esepke alý aspaptaryn keńinen paıdalaný múmkindigin qarastyrýdy tapsyrdy.
Jumys sapary barysynda Darhan Satybaldy sondaı-aq «Evrazıan Fýds Korporeıshn» AQ-da boldy. Bul kásiporynnyń 60 jyldan astam tarıhy bar jáne Qazaqstan men Ortalyq Azıadaǵy taǵam ónerkásibiniń mańyzdy nysandarynyń biri bolyp tabylady.
Munda ósimdik maıy, maıonez, kechýp, qysha, túrli soýstar, qurǵaq dámdeýishter, marınadtar jáne kondıterlik qospalar shyǵarylady. Kásiporynnyń jyldyq qýaty – 132 myń tonnadan asady. Qazirgi ýaqytta óndiristik keshende aýqymdy qaıta jańǵyrtý jumysy júrgizilýde.
Jumys saparynyń qorytyndysy boıynsha qala ákimi ónerkásip sektoryn qoldaýǵa jáne Almatynyń óndiristik áleýetin damytýǵa baǵyttalǵan birqatar tapsyrmalar berdi.