Amatyda Táýelsizdik kúni marjan sóz ustaǵan jyraýlardyń basy qosyldy.
«Dinı jyr - termeler – Táýelsizdik jarshysy» dep atalatyn is-sharaǵa Nur-Múbarak ýnıversıteti uıytqy bolǵan. Azattyq jolynda sheıit bolǵan bozdaqtar rýhyna quran baǵyshtalyp, el aǵasy Marat Toqashbaev bata jasady. Ýnıversıtet prorektory, PhD doktor Qaırat Qurmanbaev Qazaq halqynyń dástúrli mádenıeti ıslam dinimen de tonnyń ishki baýyndaı astasyp jatqanyna toqtaldy. Ol sondaı-aq óz sózinde «Qazirgi jahandaný kezeńinde jastarymyz ózge salaǵa oıysyp, qazaq rýhanıatynyń osy baǵyty álsirep barady. Soǵan qaramastan biz kóp bolyp, óz dástúrimizdi, rýhanıatymyzdy, babalardan mura asyl qazynamyzdy qoldap, nasıhattaýymyz kerek»,- dep atap ótti.
Merekelik saltanatta Aqan Abdýalı, Jáken Omarov, Elmura Jańabergen, Jaqsybek Barlybaev, Kúnsulý Túrikpen, Saltanat Tasbolat, Marat Súgirbaı, Elbol Qýanbek, Aıazbek Rústemov dástúrli ónerden shashý shashty. Elimizdiń ózge de ónerpazdary keshtiń sánin kirgizdi. Al sóz zergerlerin bastap kelgen profesor Almas Almatov uıymdastyrýshylarǵa rızashylyǵyn bildirdi.
