Qalamger osy eńbekti jazýǵa eki jyl ter tókken
Taldyqorǵanda Óńirlik komýnıkasıalar alańynda buqaralyq aqparat ókilderine "Dástúr danalyǵy" kitaby tanystyryldy, dep habarlaıdy Almaty-akshamy.kz.
Kitaptyń avtory - Jetisý oblysynyń densaýlyq saqtaý basqarmasynyń baspasóz hatshysy, jýrnalıs, jazýshy Láılim Áýbákirova. Qalamger osy eńbekti jazýǵa eki jyl ter tókkenin aıtty. Búginde onyń 3000 danasy shyqty.
Kitapta, negizinen, qazaq halqy úshin rýhanı qundylyqtyń bastaýy bolǵan salt-dástúr men ádet-ǵuryptyń búgingi qoǵamdaǵy róli men mańyzdylyǵy týraly aıtylǵan. Onda bala tárbıesinen bastap, otbasylyq, dostyq, aǵaıyndyq qarym-qatynastyń durys qalyptasýyna arqaý bolǵan qazaqtyń salt-dástúrleri men ádet-ǵuryptary kórinis tapqan.
«Aıtýly etnograftardyń jınaqtary men kitaptaryn negizge alyp, zertteýshilerdiń pikirine súıenip, salt-dástúrdiń ozyq túrleriniń qazirgi zamanda urpaq tárbıesine áseri, sondaı-aq, qoǵamda týyndaǵan máseleler men ony sheshý joldary taldandy. Jalpy qazaq dástúrinen halyqtyń minez-qulqyn, bolmysy men dúnıetanymyn, mádenıeti, tili men dinin, ómir súrý jolyn baıqaýǵa bolady. Sondyqtan jalpy qaýymǵa ulttyń altyn dińgegi – qundylyǵyn, tárbıelik túp-tamyryn túsindirý, dáripteý maqsatynda usynylǵan kitap dep aıta alamyn», – dep atap ótti L.Ahmetjanqyzy.
Jańa kitap oblystyń barlyq negizgi kitaphanalaryna jetkizildi. Sondaı-aq kitapsúıer oqyrman "Dástúr danalyǵyn" elektrondy formatta da oqı alady. Ol úshin Google izdeý júıesinde kitaptyń atyn terý jetkilikti.