Air Astana «Jas qyran» baǵdarlamasynyń alǵashqy nátıjesin usyndy
«Jas qyran» – elimizdiń daryndy balalaryn qoldaýǵa arnalǵan jol júrý granttary baǵdarlamasy. Baǵdarlamada halyqaralyq shyǵarmashylyq, sporttyq, zıatkerlik jarystar men baıqaýlarǵa qatysý úshin granttar bólinedi. Jol júrý granty bul Air Astana kompanıalar tobynyń marshrýttyq jelisi sheńberinde halyqaralyq baǵyttar boıynsha bir balaǵa jáne bir erip júretin adamǵa arnalǵan ekonom-klastyń tegin baryp- qaıtý áýebıleti.
Baıqaý erejesine sáıkes áýekompanıa jeke ótinimder negizinde aı saıyn 5 jol júrý grantyn usynýdy kózdeıdi. Grantqa ótinish berýshiler 7 jastan 17 jasqa deıingi Qazaqstan azamattary bolý kerek jáne jarysqa (konkýrs, olımpıada jáne t.b.) resmı shaqyrýy bolýy kerek.
Baǵdarlama bastalǵannan beri táýelsiz qazylar alqasy halyqaralyq konkýrstarǵa qatysý úshin 6 balany iriktep aldy. Air Astana grantynyń arqasynda Aqtóbe qalasyndaǵy «Bilim-Innovasıa» lıseıiniń 11-synyp oqýshysy Kım Artýr Gannoverdegi 7-shi Eýropalyq olımpıadada fızıkadan qola medal jeńip aldy. Almaty qalasyndaǵy №54 mekteptiń 11-synyp oqýshysy Rybalkın Matveı Beıjińdegi robototehnıka boıynsha halyqaralyq jarysta ekinshi oryn aldy, al Astanadan kelgen daryndy balalarǵa arnalǵan №9 «Zerde» mektebiniń 8-synyp oqýshysy Tynyshtyq Dıana Pragadaǵy 10-shy Halyqaralyq shahmat festıvalinde reıtıngin kóterip, halyqaralyq sport sheberi ataǵyn aldy. Taǵy úsh oqýshy osy jyldyń sońyna deıin Ulybrıtanıa men BAÁ-de halyqaralyq baıqaýlarǵa qatysýǵa attanbaq.
Air Astana prezıdenti Pıter Foster óz sózinde Qazaqstanda talantty balalar kóp ekenin jáne avıakompanıa bilimge umtylatyn jáne óz elin túrli salalarda dáripteıtin jas qazaqstandyqtardy qoldaýǵa óz úlesin qosýǵa qýanyshty ekenin atap ótti.
Taqyrypqa oraı
Roza SHÁRİPQYZY, Respýblıkalyq jeke bilim berý uıymdary qaýymdastyǵynyń tóraǵasy, komısıa múshesi:
Durys sheshim qabyldanǵanyna kózim jetti
Osy jyly ǵana bastaý alǵan baǵdarlama týraly kópshilik estip úlgermegen sıaqty. Ótinishter kóp túsken joq. Biraq solardyń ózinen de iriktep, tańdaý qıynǵa soqty. Ótinishterdiń kóbi shyǵarmashylyq baǵytta boldy.
Bul joba talantty balalardy qoldaýǵa arnalǵan. Halyqaralyq shyǵarmashylyq, sporttyq, zıatkerlik jarystarǵa baratyn balalarǵa qoldaý kórsetemiz. Armany asqaq, yntasy bar balalardyń damýyna múmkindik jasaǵymyz keldi. Mine, búgin iriktelgen balalardy kórip, durys sheshim qabyldanǵanyna kózim jetip otyr. Daryndy balalardyń armanyn oryndaýǵa kómekteskeni úshin Air Astana áýekompanıasyna alǵysymdy aıtamyn.
