Bilimdi urpaq tárbeıeleý úshin barynsha jaǵdaı bar.
Jyl saıyn Almaty halqy 70 myń adamǵa ósedi, bul áleýmettik saladaǵy sapaly qyzmetterge suranysty kúsheıtedi. Jańa oqý jylynda memlekettik jáne jekemenshik mektepterge 34 300-den astam bala qabyldandy. Nátıjesinde qaladaǵy birinshi synyptarǵa balalardyń taza aǵyny 12 myń oqýshyny qurady. Mundaı málimetterdi megapolıs ákimi Erbolat Dosaev bilim berý qyzmetkerleriniń tamyz keńesinde aıtqan bolatyn, dep habarlaıdy Almaty-akshamy.kz.
«Mektep tapshylyǵy problemasyn túbegeıli sheshý «Jaıly mektep» ulttyq jobasyn tıimdi iske asyrý bolyp tabylady, onyń aıasynda 2025 jylǵa deıin Almaty qalasynda 37,1 myń oryndyq 22 mektep iske qosylady. Infraqurylym salý jáne jer ýchaskelerin keńeıtý úshin jergilikti búdjette 19 mlrd teńge qarastyrylǵan», - dedi Almaty ákimi tamyzdaǵy jıynda.
Buǵan deıin Almaty ákimdiginiń jobalyq keńsesi habarlaǵandaı, jańa formattaǵy mektepterdiń basym bóligi Alataý jáne Naýryzbaı aýdandarynda salynady -5 oqý orny. Bostandyq aýdanynda – 4 mektep, Túrksib aýdanynda – 3, Áýezov aýdanynda – 2 mektep, qalǵan aýdandarda- bir mektepten salý josparlanýda. Mektepter bilim uıalarynyń tapshylyǵy baıqalatyn jerlerde salynýda.
Bıylǵy tamyz konferensıasynda Memleket basshysy Ult ustazy Ahmet Baıtursynulynyń «Mekteptiń jany muǵalim, muǵalim qandaı bolsa, mektebi hám sondaı bolmaqshy», degen sózin keltire otyryp, «Elimizdiń erteńi jas urpaqtyń bilimdi, eńbekqor ári otanshyl bolýyna baılanysty» degen bolatyn.
Osy oraıda bilim salasynda eńbek etken ardager ustazdar men qazirgi kúni oqýshylardy bilim nárimen sýsyndatyp júrgen muǵalimderdiń pikirin berýdi jón sanadyq.
«Men jáne meniń zamandastarym mektep esigin Uly Otan soǵysynan keıingi jyldary ashqan edik. Ol kezde oqý quraldarynyń tapshylyǵy, qaǵaz-qalamnyń jetipeýshiligine qaramastan, bizge sabaq bergen qasıetti ustazdarymyz 1,2 jyldyq ýchılıshelerde oqyp-bilim alǵandar edi. Soǵan qaramastan, oqyǵan-toqyǵany olarǵa qaırat berip, janyn sala sabaq beretin. Bul kúnderi barshamyzǵa belgili jaǵdaı, oqý-aǵartý salasyna degen kózqaras múlde ózgeshe. Onyń ózi óskeleń urpaqqa tereń bilim men tárbıe berýdiń jańa satyǵa kóterilgenin kórsetse, ustazǵa degen qamqorlyqtyń kún sanap arta túskenin kóremiz», - deıdi bar ǵumyryn ustazdyq etýge arnaǵan tarıhshy ustaz, QR Bilim úzdigi Sadyqbek Dýlatbekuly.
Sońǵy jyldary muǵalimderge memleket tarapynan barynsha jaıly jaǵdaı jasalyp keledi. Ustazdardyń áleýmettik jaǵdaılary da túzelip, eńbekaqylary 4 jylda eki esege deıin kóterilgen. Pedagogtar mártebesi de zańmen qorǵalatyn boldy. Ustazdar da sapaly bilim berý jolynda jasalyp jatqan memleket qamqorlyǵy seziletinin aıtýda.
«Pedagog mártebesi týraly» zań shyqqaly beri muǵalimder biryńǵaı mártebege ıe boldy. Ustazdardyń quqyǵy, bedeli, áleýmettik jaǵdaılary da kóterilip keledi.Keıingi jyldary muǵalimderge óte jaqsy jaǵdaı jasalyp jatyr. Memleket tarapynan baspanamen qamtamasyz etilýde. Jalaqylary eńbek ótiline baılanysty edáýir ósip otyrady. Pedogogıkalyq qyzmettegi eńbegi úshin «Qazaqstannyń eńbek sińirgen ustazy» QR- synyń memlekettik nagradalary beriledi. Demalysta densaýlyqtaryn jaqsartý maqsatynda saýyqtyrý oryndaryna jiberiledi.Alash qaıratkeri Maǵjan Jumabaevtyń «Alty Alashtyń balasy qosylsa, tór muǵalimdiki» dep aıtyp ketkenindeı muǵalimderge degen syı-qurmet bary qýantady», - deıdi №11 JBB mekteptiń qazaq tili jáne ádebıeti pániniń muǵalimi Zıash Ermekbaeva.
Sapaly bilim berý jolynda balalar úshin de, ustazdar úshin memleket deńgeıinde jasalyp jatqan jaǵdaıdy muǵalimder de jaqsy biledi. Sol jolda aıanbaı ter tógýde.
«Búgingi tańda ustaz mártebesi bıik minbelerden aıtylyp, erekshe kóńil bólinip keledi. Sananany turmys bılegen zamanda ustazdyń turmys taýqymeti jadynda turmaý kerek. Iá, biz qazirgi qoldaýlardy sezinemiz, túsinemiz. Bul ustazǵa qurmetpen birge, ultqa degen janashyrlyqtyń kórinisi dep bilemin. Aıtýly kúnde barsha ustazdar qaýymyna, ardager ustazdarymyzǵa eńbekteriniń jemisin kórýdi tileımin. Álıhan Bókeıhan atamyzsha aıtqanda ultqa qyzmet etý bilimnen emes minezden. Bizdiń minez túzelse, ulttyń minezi túzeledi», - deıdi №152 mektep-gımnazıasynyń muǵalimi A.Dýlatbek.
Búgin qadirli de qasıetti, barsha qurmetke laıyq ustazdar merekesi. Bilimdi urpaq – ult bolashaǵy. Endeshe osy jolda eńbek etip júrgen ustazdar jaıly aıtý artyq emes.