Almaty polısıasyna jarylǵysh zat týraly jalǵan habarlama bergen oqýshynyń ata-anasy jaýapqa tartyldy.
Telefon terrorısti 14 jastaǵy jasóspirim bolyp shyqty. Ekstremızmge qarsy kúres basqarmasynyń málimetinshe, 2009 jyly týǵan R.esimdi azamat áleýmettik jeli arqyly óziniń tanysyna mektebine jarylǵysh zat qoıýdy josparlap júrgenin aıtyp qorqytqan, dep habarlaıdy Almaty-akshamy.kz Polisia.kz-ke silteme jasap.
«Bul týraly polısıaǵa 2 qazan kúni saǵat 10:43-te sıgnal kelip tústi. Jedel jáne arnaıy is-sharalar kesheni júrgizilip, nátıjesinde aty-jóni belgisiz adam anyqtaldy. Jas jigittiń sózinshe, jalǵan habarlama jiberý arqyly ol dosyn mazaq qylmaq bolǵan. Bul ázil úshin jasóspirimniń ata-anasy jaýapqa tartyldy. Olardyń ústinen QR ÁQBtK-niń 127-baby boıynsha ákimshilik is qozǵaldy. Jınalǵan ákimshilik materıal kámeletke tolmaǵandardyń isteri jónindegi mamandandyrylǵan aýdanaralyq sotyna joldanatyn bolady», – dedi Almaty qalalyq PD ekstremızmge qarsy kúres basqarmasynyń bastyǵy Darhan Ábiqulov.
Sondaı-aq polısıa mundaı zańsyz áreketter tótenshe jaǵdaılar men quqyq qorǵaý organdarynyń aıtarlyqtaı kúshteri men resýrstaryn jumsaýǵa ákep soǵatynyn eske saldy. Aıta keterligi, kináli adam jaýapqa tartylýmen qatar, sot sheshimimen jalǵan qońyraý shalǵany úshin shyǵyndy tolyǵymen tóleıdi. Sondaı-aq PD-da QR QK-niń 273-babynyń talaptaryna sáıkes terorızm aktisi týraly jalǵan habarlaý bes jylǵa deıin bas bostandyǵynan aıyrýǵa jazalanatynyn eske saldy.