Joba balalar jyly aıasynda júzege asyryldy.
Mádenıet jáne sport mınıstrligi «Arman asýlary» atty áleýmettik pılottyq jobany qolǵa aldy, dep habarlaıdy Almaty-akshamy.kz
Jobanyń basty maqsaty – Qazaqstannyń barlyq óńirinen erekshe bilim berý qajettiligi bar daryndy balalarǵa qoldaý kórsetý, shyǵarmashylyq baǵytta damytý. Osyǵan oraı Astanada respýblıkalyq festıvál ótti. Festıválge 150-den astam erekshe qajettiligi bar daryndy balalar qatysty, dep habarlaıdy mádenıet jáne sport mınıstrligi.
Mádenıet jáne sport mınıstri Dáýren Abaev gala konsertke qatysqan balalardy quttyqtap, ınklúzıvti bilim berý men qoǵamdy damytýda mundaı jobanyń mańyzy zor ekenin atap ótti.
«Óner – adamnyń janyn ǵana emdemeıdi, onyń tánine de tirek bolady. Balalardyń talantyn ashýda mundaı alańdar qashanda qajet. Sondyqtan osy jobany júzege asyrýǵa atsalysqan azamattardyń barlyǵyna alǵys aıtamyn. Sizder balalardy baqytty, al qoǵamdy meıirimdi etýge úles qosyp otyrsyzdar», - dedi Dáýren Abaev.
Gala-konsertte talantty balalar tanymal juldyzdarmen birge óner kórsetti. Uıymdastyrýshylar muny festıvál ereksheliginiń biri retinde atap ótti.