Qazaqstan Respýblıkasynyń Mádenıet jáne aqparat mınıstrligi «Daryn» memlekettik jastar syılyǵyna baıqaý jarıalaıdy
«Daryn» memlekettik jastar syılyǵy - ǵylym, shyǵarmashylyq, qoǵamdyq qyzmet salalarynda jemisti eńbegimen kózge túsken, sondaı-aq joǵary sporttyq jetistikteri úshin daryndy jastardy memleket tarapynan qoldaý maqsatynda usynylady, dep habarlaıdy Almaty-akshamy.kz.
Baıqaý «Ádebıet», «Ǵylym», «Dızaın jáne beıneleý óneri», «Jýrnalısıka», «Klasıkalyq mýzyka», «Kreatıvti bastamalar», «Sport», «Teatr jáne kıno», «Estrada», «Halyq shyǵarmashylyǵy» atty 10 nomınasıa boıynsha ótedi.
Syılyq alýǵa halyqaralyq jáne respýblıkalyq konkýrstardyń, festıváldar men túrli sharalardyń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary, sondaı-aq qyzmeti ınovasıalyq bolyp tabylatyn jáne tıisti sala men tutastaı qoǵamdy damytýǵa yqpal etken Qazaqstan Respýblıkasynyń 35 jasqa deıingi azamattary úmitker bola alady.
«Daryn» jastar syılyǵyn alýǵa kandıdatýralardy usynýdy memlekettik organdar, qoǵamdyq birlestikterdiń ókilderi júrgizedi.
Jeńimpazdarǵa «Daryn memlekettik jastar syılyǵynyń laýreaty» ataǵy beriledi jáne olar dıplommen, tósbelgilermen sondaı-aq qarjylaı syılyqpen marapattalady.
Jyl saıyn syılyqty usyný Qazaqstan Respýblıkasynyń Táýelsizdik kúnin merekeleý aıasynda ótkiziledi.
«Daryn» jastar syılyǵy 1992 jyly taǵaıyndalǵan. Ár jyldary atalǵan syılyqty túrli saladaǵy 320-dan astam azamat ıelengen bolatyn.
Konkýrsqa qatysýǵa qujattar 2023 jylǵy 20 qarashaǵa deıin Qazaqstan Respýblıkasy Mádenıet jáne aqparat mınıstrliginiń Jastar jáne otbasy isteri komıteti (qaǵaz nusqada) myna mekenjaı boıynsha: Astana qalasy, Mángilik el dańǵyly 10, «Mınıstrlikter úıi» ǵımaratynda (14-kireberis) qabyldanady.
Al elektrondyq nusqany premiya.daryn@gmail.com poshtasyna joldaýǵa bolady. Baılanys nomerleri: 8(7172) 74-05-25, 8(7172) 74-18-43, 8 701 170 46 54.