Emhanalar men stasıonarlardaǵy medısınalyq kómekke qoljetimdilikti arttyrý maqsatynda QR Densaýlyq saqtaý mınıstrligi halyqaralyq standarttarǵa saı, dıagnostıkalyq rásimderdi ońtaılandyrý jumystaryn júrgizdi. Jańa standartqa sáıkes, stasıonarǵa jatqyzylatyn naýqastardy emdeýge qajet negizgi 13 zertteý anyqtaldy. Jańa standarttyń artyqshylyǵyn Almatynyń №8 emhanasynyń epıdemıolog-dárigeri Madına TÝASHEVA tarqatyp aıtyp berdi.
– Stasıonarǵa jatqyzylatyn naýqastardyń emi shuǵyl jáne josparly em bolyp bólinedi. Josparly emdeýge jatqyzý – bul shuǵyl medısınalyq aralasýdy qajet etpeıtin sozylmaly aýrýlar men ómirge qaýipti emes jaǵdaılardyń kórsetkishteri bolǵan kezde naýqastardy stasıonarǵa emdeýge jiberý. Stasıonarǵa aldyn ala josparly túrde jatatyn naýqastar áýeli birqatar zerthanalyq analızder tapsyryp, aspaptyq zertteýlerden ótedi. Eger buryn bul taldaýlar, zertteýler jáne dáriger-mamandardyń qorytyndylary 10 kúnge jaramdy bolsa, endi bul merzim 14 kúnge deıin uzartyldy. Sonymen qatar, keıbir zertteýlerdiń nátıjeleri 1 aıdan 6 aıǵa deıin sozylady. Iaǵnı, bul emhana úshin de, emdelýshi naýqas úshin de óte tıimdi. Óıtkeni, josparly em alýǵa daıyndalyp júrgen naýqastyń qajetti analızderi, zertteýler qorytyndysy stasıonarǵa jetkenshe óz kúshin joıyp, ýaqyty ótip ketip, sol analızderin 10 kúnnen keıin qaıta tapsyrýǵa májbúr bolady. Engizilip otyrǵan ózgeristiń bir tıimdiligi osy. Sondyqtan bul jańa standart naýqas úshin de, emhana úshin de tıimdi. Máselen, emhanamyzda 21 kún saıyn stasıonarǵa jatyp em alatyn naýqastarymyz ýaqytyn únemdeıdi, al emhana qajetsiz shyǵyndardan arylyp, qarajat kózin tıimdi paıdalanady.