Almatyda jańa mektepter ashylyp, pedagogtardy qoldaý baǵdarlamalary keńeıtilip keledi
Almatyda Muǵalimder kúnine arnalǵan saltanatty is-shara ótti. Qala ákimi Darhan Satybaldy quttyqtaý sózinde ustazdardyń el damýyndaǵy aıryqsha rólin atap ótip, jas urpaqty tárbıeleýdegi adaldyǵy úshin pedagogtarǵa alǵys bildirdi, - dep habarlaıdy Aqshamnews.kz.
«Bul kúni biz balalarǵa jol siltep, bilim berip, ómirlik baǵyt-baǵdar tabýǵa kómektesetin jandarǵa shynaıy alǵys bildiremiz. Ustaz mártebesi biz úshin qashanda erekshe», – dedi ákim.
Bilim berý salasynda qaýipsiz orta qalyptastyrýǵa erekshe nazar aýdarylyp otyr. Ákimniń aıtýynsha, Almatyda mektep psıhologtarynyń jumysy kúsheıtilip, balalardyń quqyǵyn qorǵaý jáne psıhologıalyq qoldaý ortalyqtary ashyldy.
«Ár balanyń daýysy eskerilýi mańyzdy. Biz tek birlesken kúsh-jigerdiń arqasynda ár oqýshy ózin qaýipsiz sezinetin ári qoldaý tabatynyna senimdi bolatyn orta qura alamyz», – dep atap ótti Darhan Satybaldy.
Ákim mektep ınfraqurylymyn damytýǵa da toqtaldy. Muǵalimder kúni qarsańynda Almatyda «Keleshek mektepteri» jobasy aıasynda bes jańa mektep ashyldy. Jyl sońyna deıin taǵy altaýy iske qosylady. Jalpy qalada 20 zamanaýı bilim berý mekemesi paıdalanýǵa beriledi dep josparlanǵan. Budan bólek, «1300 mektep» ulttyq jobasy júzege asyrylyp jatyr. Onyń aıasynda 2027 jylǵa deıin 31 bilim ordasy tolyq jańǵyrtýdan ótpek.
«Biz árqashan pedagogtardy qoldaımyz. Almatyda tórtinshi jyl qatarynan «Almaty Ustazy» baıqaýy ótýde. Bul kásibı damýǵa jáne tájirıbe almasýǵa arnalǵan alańǵa aınaldy. Úzdik ustazdar Fınlándıa, Sıngapýr, Estonıa syndy aldyńǵy qatarly elderdiń mektepterinde taǵylymdamadan ótip júr. Bıyl bul tizimge Qytaı Halyq Respýblıkasy da qosyldy», – dedi qala ákimi.
Saltanatty is-sharanyń merekelik kóńil-kúıin konserttik baǵdarlamalar tolyqtyrdy. Sahnada qazaqstandyq estrada juldyzdary, shyǵarmashyl jastar ujymdary men mektep ansámblderi óner kórsetip, ustazdarǵa arnap án men bı tartý etti.
İs-shara barysynda marapattaý rásimi ótti. Qalanyń úzdik ustazdary Almaty ákimi atynan joǵary kásibıligi, mamandyǵyna adaldyǵy jáne bilim berý salasyn damytýǵa qosqan úlesi úshin qurmet gramotalary men alǵys hattarǵa ıe boldy. Birqatar muǵalimge tósbelgi men qundy syılyq tabys etildi.