Almaty ákimi Darhan Satybaldy Jetisý jáne Túrksib aýdandaryndaǵy ónerkásiptik nysandarǵa baryp, olardyń jumysymen, óndiristik áleýetimen jáne ınvestısıalyq josparlarymen tanysty, dep habarlaıdy aqshamnews.kz
Aldymen qala ákimi Jetisý aýdanynda ornalasqan «Asfáltobeton-1» JSHS-na bardy. Bul – qaladaǵy jol-qurylys materıaldaryn shyǵaratyn iri kásiporyndardyń biri. Munda jylyna 1,5 mln tonnaǵa deıin asfáltbeton qospasy, 100 myń tonnaǵa deıin munaı bıtýmy, sondaı-aq beton qospalary men tas materıaldary óndiriledi.
Zaýytta 700 adam eńbek etedi. Kásiporyn aýmaǵy 26 gektardy qamtıdy, onyń 5 gektary jasyl jelekke bólingen.
Kelesi nysan – Jetisý aýdanynda ornalasqan «Kelet» aksıonerlik qoǵamy. 1992 jyly qurylǵan kásiporyn qazandyqtar men sorǵy beketterinen bastap, komýnaldyq salaǵa arnalǵan zamanaýı jabdyqtarǵa deıin keń aýqymdy elektrotehnıkalyq ónim shyǵarady.
Kompanıanyń jyldyq aınalymy shamamen 12 mlrd teńge, sonyń jartysy Qazaqstanda óndiriledi. «Kelet» ónimderi ishki naryqpen qatar Reseı, Qyrǵyzstan jáne Belarýs elderine jetkiziledi.
Darhan Satybaldy kásiporynnyń damý perspektıvalaryna toqtalyp:
«Otandyq óndiris pen mashına jasaý salasynyń damýy Almaty úshin de, elimiz úshin de strategıalyq mańyzǵa ıe. Jumysshy mamandyqtar jyly aıasynda biz óndiristi keńeıtýge jáne jańa jumys oryndaryn ashýǵa qoldaý kórsetýge daıynbyz», – dedi.
Túrksib aýdanynda ákim «Samal» zaýytynda boldy. Qaıta jańǵyrtýdan keıin munda 336 jumys orny qurylyp, óndiristik qýat aıyna 12 mln lıtr aýyz sýǵa deıin artqan. Kásiporynda zamanaýı jabdyq ornatylǵan, tereńdigi 250 metr bolatyn eki artezıan qudyǵy jáne ónimdi jetkizýge arnalǵan avtopark jumys isteıdi.
Sońǵy nysan – 1989 jyly qurylǵan Alina Group kompanıasynyń qurǵaq qurylys qospalary zaýyty. Búginde bul – Qazaqstandaǵy qurylys ındýstrıasynyń jetekshi kásiporyndarynyń biri. Zaýyt 1997 jyldan beri AlinEX jáne «NASHI» brendterimen ónim shyǵaryp keledi. Jyldyq óndiristik qýaty 315 myń tonnadan asady, bul Almaty men elimizdiń ońtústik óńirlerin tolyq qamtýǵa múmkindik beredi.
Kásiporynda shamamen 200 adam jumys isteıdi. Ónim assortımentine sement pen gıps negizindegi sylaqtar, sándik qaptamalar, edenge arnalǵan tegisteý qospalary, jelimder jáne gıdrooqshaýlaǵysh materıaldar kiredi. Bul zaýyt – búginde 18 óndiristik alańy bar Alina Group kompanıasynyń alǵashqy kásiporny.
Jumys saparynyń qorytyndysy boıynsha ákim jaýapty qyzmetterge qala ónerkásibin ári qaraı qoldaý sharalaryn pysyqtaýdy tapsyrdy. Negizgi basymdyq – jańa jumys oryndaryn ashýǵa, zamanaýı tehnologıalardy engizýge jáne ekologıalyq standarttardy saqtaýǵa berildi.