Almaty ákimi Darhan Satybaldynyń tóraǵalyǵymen qala ákimdiginde «Taza Qazaqstan» baǵdarlamasy aıasyndaǵy is-sharalardyń oryndalýyna qatysty jıyn ótti. Onda 2025 jyldyń III toqsanynda atqarylǵan ister saralanyp, aldaǵy mejeler aıqyndaldy.
Shilde-qyrkúıek aralyǵynda qalada 367 is-shara ótkizilip, oǵan 337 myńnan astam adam qatysty. 376 tonnadan astam qoqys jınaldy, shamamen 600 gektar aýmaq tazartylyp, 912 aǵash pen buta otyrǵyzyldy.
Senbilik uıymdastyrýǵa basa nazar aýdaryldy. Toqsan ishinde 128 senbilik ótti, onyń ishinde 4 jalpyqalalyq senbilikke 40 myńnan astam turǵyn men erikti qatysty. Bul aýqymdy is-sharaǵa 2 myńnan astam arnaıy tehnıka jumyldyrylyp, 20 myń tekshe metrden astam qoqys shyǵaryldy.
27 qyrkúıekte mektepter men balabaqsha ujymdary, medısınalyq uıymdar, bıznes ókilderi jáne qala turǵyndary qatysqan keń aýqymdy jalpyqalalyq senbilik ótti. Aksıaǵa 4 myńǵa jýyq adam men 143 arnaıy tehnıka tartylyp, bir kúnde 1,6 myń tekshe metrden astam qoqys jınalyp shyǵaryldy.
Sonymen qatar qyrkúıek aıynda 100 myń buta otyrǵyzý boıynsha jumystar bastaldy. Búginde 4 myńnan astam ósimdik egildi, shamamen 7 myń oıyq daıyndaldy. Otyrǵyzylǵan kóshetterdi «Lýkomore» tálimbaǵy jetkizse, olardyń sapasyn Bas botanıkalyq baq maquldady.
Aýdandyq kórsetkishter boıynsha úzdikter qatarynan Alataý aýdany ozyq shyqsa, Medeý, Naýryzbaı jáne Túrksib aýdandary da joǵary nátıjesimen kózge tústi.
Darhan Satybaldynyń aıtýynsha, «Taza Qazaqstan» búginde jaı ǵana ekologıalyq joba emes, qala turǵyndaryn ortaq iske jumyldyratyn qýatty qozǵalysqa aınaldy. Ákim aldaǵy ýaqytta barlyq aýdannyń qatysýymen ekologıalyq aılyq ótkizýdi usyndy.
«Qalanyń tazalyǵy bizdiń mádenıetimizdiń, bolashaqqa degen qurmetimizdiń aınasy. Eń bastysy, osy qarqyndy báseńdetpeı, turǵyndarmen, kásipkerlermen, qoǵamdyq uıymdarmen birge tize qosyp eńbek etý», – dedi Almaty ákimi.