Zańda jáne Parlament Reglamentterinde depýtattyń jumysyna naqty talaptar qoıylǵan.
Aqshamnews.kz redaksıasy osy jaǵdaıǵa qatysty joldaǵan resmı saýalǵa QR Prezıdenti İs basqarmasy jaýap berdi. Resmı málimetke sáıkes, depýtattyń jalaqysy men parlamenttik sóz sóıleý quqyǵynan qandaı jaǵdaıda aıyrylatyny zańmen jáne Parlament reglamentterimen naqty rettelgen.
Eger ol:
- Parlament nemese Palata otyrysyna úsh retten artyq dálelsiz sebeppen kelmese, bolmaǵan kúnderge jalaqy tólenbeıdi;
- Basqa depýtat úshin zańsyz daýys berse – aılyq jalaqysynan tolyqtaı aıyrylýy múmkin;
- Daýys berý quqyǵyn buzǵany anyqtalsa – daýysty ruqsatsyz bergen kúnine jalaqy tólenbeıdi.
Qandaı jaǵdaıda depýtat sózden aıyrylady?
Senat pen Májilis Reglamentterine sáıkes Senat depýtaty ózi saılanǵan Parlamenttiń, Palatanyń jáne olardyń organdarynyń jumysyna qatysýǵa mindetti, al Májilis depýtaty ózi saılanǵan Parlamenttiń, Palatanyń jáne olardyń organdarynyń, sondaı-aq parlamenttik tyńdaýlardyń, úkimettik saǵattar men jumys toptarynyń jumysyna qatysýǵa mindetti.
Belgilengen reglamentter buzylǵan jaǵdaıda tıisti Palata Tóraǵasynyń sheshimimen depýtatqa kelesideı jazalaý sharalary qoldanylýy múmkin:
- parlamenttik aıyptaý;
- kópshilik aldynda keshirim suraýǵa májbúrleý;
- palatalardyń bir birlesken nemese bólek otyrysy ishinde sózden aıyrý;
- palatalardyń úsh birlesken nemese bólek otyrysy ishinde sózden aıyrý;
- palatalardyń bir birlesken nemese bólek otyrysy ýaqytynda májilis zalynan shyǵarý;
- palatalardyń úsh birlesken nemese bólek otyrysy ýaqytyna májilis zalynan shyǵarý;
- bir kúndik jalaqydan aıyrý.
Eske sala keteıik, buǵan deıin 2026 jyly Parlamentti ustaýǵa 7,8 mlrd teńge bólinetinin jazǵan edik.