2025 jylǵy 2 qazanda Qazaq ūlttyq qyzdar pedagogıkalyq unıversıtetínde tsıfrlyq bílím berudí jańa deńgeıge kóteruge baǵyttalǵan mańyzdy bastama júzege asty.
Unıversıtet janyndaǵy Digital Lady tehnoparkínde úsh bírdeı zamanauı zerthana – «Apple class», «3D Lab» jáne «Atomdyq jáne yadrolyq fızıka» zerthanalary saltanatty túrde ashyldy, - dep habarlaıdy Aqshamnews.kz.
Būl jobalar Memleket basshysy Qasym-Jomart Toqaevtyń bıylǵy Joldauynda aıtylǵan tsıfrlandyru men jasandy ıntellekttí engízu jóníndegí strategıyalyq maqsattarmen tolyq úndesíp otyr.
Zerthanalardyń ashylu saltanatyna Prezıdent janyndaǵy Ūlttyq ǵylym akademıyasy Dırektorlar keńesíníń táuelsíz dırektory, akademık, Ūlttyq qūryltaı múshesí Kárímbek Arystanbekūly Qūrmanálıev, Aqparattyq jáne esepteu tehnologıyalary ınstıtutynyń Bas dırektory, QR ŪIA akademıgí, professor, f.-m.ǵ.d. Maqtaǵalı Ábdímájıtūly Bektemísov, ITeacher Academy negízín qalaushy, Apple Authorized Reseller Yulıya Andreeva, QyzPU professorlyq-oqytushylyq qūramy qatysty.
QyzPU rektorynyń míndetín atqarushy Sábıt Suataıdyń aıtuynsha, jańa zerthanalardyń studentterge beretín múmkíndíkteríne toqtaldy.
«Qazírgí zamanda bílím beru júıesí tek teorıyamen shektelíp qalmaı, tájírıbe men tehnologıyany úılestírudí talap etedí. Búgíngí tańda ashylyp otyrǵan zerthanalar – osy baǵyttaǵy naqty qadamymyz. Olar studentterge zamanauı qūraldarmen jūmys ísteu, óz ıdeyalaryn prototıpke aınaldyru, tsıfrlyq ortada erkín áreket etu sekíldí mańyzdy daǵdylardy meńgeruge jol ashady. Digital Lady tehnoparkíníń negízínde qūrylǵan Apple class, 3D Lab jáne «Atomdyq jáne yadrolyq fızıka» zerthanalary oqu mazmūnyn tájírıbemen ūshtastyra otyryp, capstone-jobalar men ǵylymı zertteulerge negíz bolmaq. Sonymen qatar būl zerthanalar halyqaralyq hakatondarǵa, startaptyq baǵdarlamalarǵa qatysuǵa, halyqaralyq seríktestíktermen bírlesken jobalar júrgízuge múmkíndík beredí», – dedí Sábıt Qūrmanjanūly.
«Atomdyq jáne yadrolyq fızıka» zerthanasy – studentterge atom yadrosynyń qūrylymy men qasıetterín tereń túsínuge múmkíndík beretín ǵylymı ortalyq. Zerthana «Rezonanstyq potentsıaldy Frank jáne Gerts ádísímen anyqtau», «Zeeman effektísí», «Ekí elektrondy júıelerdíń atomdyq spektrlerí: He, Hg», «Fotoeffekt kómegímen Plank tūraqtysyn anyqtau», «Balmer serıyasy», «Rıdberg tūraqtysyn anyqtau» sıyaqty atomdyq fızıkanyń mańyzdy taqyryptaryn qamtıtyn zertteuler júrgízuge múmkíndík beredí. Mūnda jas ǵalymdar men studentter praktıkalyq tájírıbe alyp, yadrolyq fızıka salasyndaǵy zertteuler júrgíze alady.
«8 qyrkúıektegí Joldauda Qasym‑Jomart Toqaev atom elektr stantsıyalarynyń (AES) mańyzdylyǵyn atap ótíp, elímízdíń energetıkalyq júıesín kúsheıtu maqsatynda: Qazaqstanda ekínshí, típtí úshínshí AES saludy josparlaudy bastau qajet ekenín aıtqan bolatyn. Būl elímízdíń ekonomıkalyq tūraqtylyǵyn qoldau, elektr energıyasyna sūranysty qamtamasyz etu, energıya qauípsízdígín kúsheıtuge baǵyttalǵanyn túsínemíz. Būryn sabaqta ár túrlí vıdeolar arqyly ǵana kórsetsek, qázírgí tańda naqty qūraldar kómegímen kórsete alamyz», – dedí hımıya ǵylymdarynyń kandıdaty, dotsent Túgelbaeva Gúlnázıya.
«3D Lab» zerthanasy – ǵylymı-zertteu jáne tájírıbelík jobalardyń jańa alańy. Ol vırtualdy jáne tolyqtyrylǵan shynaıylyq (VR/AR) qūrylǵylarymen, ınjenerlík jobalauǵa arnalǵan programmalarmen jabdyqtalǵan. Zerthana studentterge úshólshemdí modeldeu, ǵylymı obektílerdí jobalau, vırtualdy tájírıbeler júrgízu jáne óz startap ıdeyalaryn tájírıbede júzege asyruǵa múmkíndík beredí. Būl zerthana bolashaq mamandardy zertteushí, jańashyl tūlǵa retínde qalyptastyruǵa baǵyttalǵan ınnovatsıyalyq orta bolyp tabylady.
«3D Lab zerthanasynda bílím alushylar óndíríste qoldanylatyn qosalqy bólshekterdíń 3D úlgílerín ázírleı alady. Áleumettík jobalarǵa mysal retínde, estu nemese kóru qabíletí zaqymdanǵan balalarǵa arnalǵan oqu qūraldarynyń 3D úlgílerín daıyndaudy keltírsek bolady.
Jasandy ıntellekt salasyndaǵy zerthanalyq jūmystarda alynǵan tájírıbe studentterdíń eńbek naryǵynda bírden beıímdeluín qamtamasyz etedí», – dedí Pedagogıka ǵylymdarynyń doktory, professor Serík Keńesbaev.
«Apple class» zerthanasy – tsıfrlyq bílím berudíń jańa ortalyǵy. Zerthana tolyqtaı iMac jáne iPad qūrylǵylarymen, zamanauı multımedıyalyq jabdyqtarmen jáne ınteraktıvtí smart-panelmen qamtylǵan. Mūnda studentter qoldanbaly programmalau, mobıldí qosymshalar jasau, kreatıvtí jobalardy ázírleu jáne grafıkalyq dızaın negízderín meńgeredí. Sonymen qatar zerthanada Apple Teacher jáne basqa halyqaralyq oqu baǵdarlamalary boıynsha oqytushylar men studentterdí sertıfıkattau múmkíndígí qarastyrylǵan.
«Zerthana Apple ekojúıesíndegí zamanauı qūrylǵylarmen jūmys ísteuge arnalǵan Qazaqstandaǵy alǵashqy tolyqqandy ortalyqtardyń bírí. Mūnda bílím alushylar tek tehnıkalyq daǵdylardy ǵana emes, sonymen qatar shyǵarmashylyq qabíletterín damytuǵa múmkíndík alady. Ekínshíden, Apple Lab tsıfrlyq sauattylyqty jańa deńgeıge kóteríp, bílím alushylardy mobıldí qosymsha jasau, multımedıa ónímderín ázírleu, grafıkalyq dızaın jáne anımatsıya sıyaqty baǵyttarǵa tartady. Būl zerthana bílím berudí halyqaralyq standarttarǵa jaqyndatatyn alań retínde qyzmet atqarady dep senemín, sebebí Apple ónímderí álemníń aldyńǵy qatarly unıversıtetterí men kompanıyalarynda keńínen qoldanylady», – dedí Informatıka kafedrasynyń aǵa oqytushysy, PhD Aıgúl Mahanova.
Unıversıtet rektorynyń m.a. Sábıt Suataı aldaǵy uaqytta unıversıtet tsıfrlyq transformatsıyaǵa basymdyq beretínín atap óttí.
«Bíz unıversıtettíń tsıfrlyq transformatsıya strategıyasyn júzege asyruda derekterge negízdelgen basqaru, ınnovatsıyalyq ekojúıe qalyptastyru jáne kadrlardy naqty eńbek naryǵyna beıímdeuge basymdyq beríp otyrmyz. Jańa zerthanalar – būl tek ınfraqūrylym emes, sonymen qatar studentterímízdíń shyǵarmashylyǵyn, ınjenerlík oılauyn, kásípkerlík áleuetín damytatyn orta. Olar studentterdíń portfolıosyna naqty óním men joba ákeletín, eńbek naryǵynda básekege qabílettí maman retínde qalyptasuyna tíkeleı áser etetín alańǵa aınalady. Bíz aldaǵy uaqytta Apple, Autodesk, DAAD, Erasmus+ sekíldí halyqaralyq ūıymdarmen seríktestíktí nyǵaıta otyryp, bílím beru mazmūnyn jańǵyrtuǵa jáne ony ádístemelík tūrǵyda eksporttauǵa daıynbyz. Unıversıtetímízdíń jańa buynǵa baǵyttalǵan būl bastamalary elímízdíń bílím beru salasynyń damuyna serpín beredí dep senemíz», – dedí ol.
