Almaty ákimi Darhan Satybaldy kólik ınfraqurylymyn damytýǵa baǵyttalǵan jobalarmen tanysyp, Jibek joly men Raıymbek batyr dańǵyly boıyndaǵy BRT (joǵary jyldamdyqty avtobýs júıesi) jelileriniń qurylys barysyn tekserdi.
Jeltoqsan kóshesinde uzyndyǵy 4,6 shaqyrym bolatyn BRT jolaǵy joldyń shet jaǵynda bolady. Bul ýchaske qazirgi Tımırázev kóshesindegi BRT jelisimen jáne Raıymbek batyr dańǵylynda salynyp jatqan jelimen qosylady.
Qazirgi ýaqytta kóshede jıektastar túzetilip, búlingen aryq naýalary aýystyryldy, jaıaý júrginshiler jolynyń 60 paıyzyna taqta tastar tóseldi. Aýmaq boıyndaǵy asfáltbeton jamylǵysy túgeldeı derlik jańartyldy.
Darhan Satybaldy Qalalyq mobıldilik basqarmasynyń basshysy Saǵyndyq Telibaevqa barlyq jol qurylysy jumysyn, onyń ishinde jol belgilerin syzyp, tamyz aıynyń sońyna deıin aıaqtaýdy, kógaldandyrý kólemin ulǵaıtýdy jáne trotýar boıynda qosymsha jaryq kózderin ornatýdy tapsyrdy.
Keıin shahar basshysy Raıymbek batyr dańǵyly boıyndaǵy BRT jelisiniń qurylys barysyn kórip qaıtty. Joba aıasynda úzdiksiz arnaıy jolaqtar, jańa aıaldama keshenderi ornatylyp, dańǵyl boıy «qasbetten qasbetke deıin» qaǵıdaty boıynsha kóriktendiriledi.
Almaty ákimi BRT jelisin keńeıtý qalanyń kólik júıesin damytýǵa arnalǵan sheber jospardy júzege asyrýdaǵy negizgi baǵyttardyń biri ekenin atap ótti.
Salaǵa jaýapty basqarmamen merdiger uıymdarǵa qurylys jumystaryn sapaly ári qarqyndy júrgizý júkteldi. Jobany júzege asyrý kezinde jaıaý júrginshilerdiń jaılylyǵy men qaýipsizdigine erekshe nazar aýdarý, jumystardyń barysy men kólik qozǵalysyndaǵy ózgerister týraly halyqty der kezinde habardar etý mindetteldi.
Aıta ketý kerek, Raıymbek batyr dańǵyly boıyndaǵy BRT jobasy kólik modeldeý nátıjeleri boıynsha ázirlenip, qazirgi jáne bolashaqtaǵy kólik legi ázirlengen. Joba júzege asqannan keıin qoǵamdyq kóliktiń ortasha qozǵalys jyldamdyǵy 50%-dan 70%-ǵa deıin artpaq.