Eńbek jáne halyqty áleýmettik qorǵaý mınıstrliginiń Memlekettik eńbek ınspeksıasy komıtetiniń tóraǵasy Erbolat Ábilhatın jańa jumys kestesiniń tıimdiligi týraly saýalǵa jaýap berdi, - dep habarlaıdy Aqshamnews.kz tilshisi Massaget.kz-ke silteme jasap.
"Ótken aıda Eńbek mınıstrligi jańa jumys kestesine kóshti: 08:00-den 17:30-ǵa deıin jumys isteıdi. Bul shara qanshalyq tıimdi boldy, burynǵydaı 09:00-den bastap jumys isteıtin basqa vedomstvolarmen ózara is-qımyl kezinde qıyndyqtar týyndamady ma? Bul qyzmetkerlerdiń ózderine qalaı áser etti, qıyndyqtar boldy ma?" degen suraq qoıyldy.
Komıtet basshysy bul ózgeris Eńbek mınıstrliginiń jumysyna oń áserin tıgizgenin málimdedi.
"Tańerteń keptelissiz jetip alamyz, jumysta segizde bolý úshin 07:30-da shyǵasyń. Kósheler bop-bos, bul jaǵy da oń áser etti. Jumystan saǵat 17:30-da shyǵady, adamdar otbasyna kóńil bóle alady, jeke isimen aınalysa alady", - dedi Erbolat Ábilhatın.
Sheneýniktiń aıtýynsha, basqa memlekettik organdarmen ózara is-qımyl kezinde de máseleler týyndamaǵan. Ol Astana Máslıhaty elordanyń basqa mekemeleriniń jumys rejımin aýystyrý máselesin de qarastyryp jatqanyn eske saldy.
"Jumys berýshi óziniń yńǵaıyna baılanysty keste jasaıdy. Eshqandaı qolaısyzdyq týyndaǵan joq, qyzmetkerlerden de shaǵym túspedi, kerisinshe olar erterek ketkenine qýanady", - dedi ol.
Jýrnalıser qyrkúıekte sabaq bastalatynyn eske salyp, balalary bar qyzmetkerler bul kezde ne isteıtinin surady.
Komıtet tóraǵasynyń aıtýynsha, balalaryn mektepke jetkizip salýǵa nemese mektepten alyp ketýge týra keletin qazaqstandyqtar jumysqa yńǵaıly ýaqytta, mysaly tańǵy saǵat 9-10-da kele alady. Eń bastysy olar belgilengen 8 saǵat jumys isteýi qajet.