Almaty ákimi Darhan Satybaldy Túrksib aýdanyndaǵy birqatar óndiristik jáne logıstıkalyq nysandy aralap, ınvestısıalyq jobalardyń júzege asý barysymen, jańa jumys oryndarynyń qurylýymen jáne óndiris úderisine zamanaýı tehnologıalardyń engizilýimen tanysty.
Alǵashqy nysan – zamanaýı «Damiani» ýaqytsha saqtaý qoımasy. Kásiporyn jalpy quny 7 mlrd teńgeden astam «A» sanatyndaǵy qoıma kesheniniń birinshi kezeńin iske asyrdy. Onyń aıasynda 200-den astam jańa jumys orny ashyldy. Qoıma kesheni halyqaralyq standarttarǵa saı jáne ekologıalyq tıimdilik boıynsha BREEAM sertıfıkatyna ıe (baǵalaý deńgeıi – GOOD).
Keshen aýmaǵynda álemdik jetekshi brendter – Komatsu, Toyota Motors jáne Sportmaster ornalasqan. Sondaı-aq, Toyota kompanıasynyń 1 myń sharshy metr aýmaqty qamtıtyn oqý ortalyǵy ashyldy. Munda Qazaqstan men Qyrǵyzstan avtosalondarynyń qyzmetkerleri oqytylady. Qazirgi ýaqytta jobanyń ekinshi jáne úshinshi kezeńi júzege asyrylyp jatyr, onyń aıasynda jalpy aýdany 37 myń sharshy metr bolatyn qoıma ǵımarattary salynady. Jalpy ınvestısıa kólemi 15 mlrd teńgeden asady.
Kelesi nysan – logıstıkalyq jáne qoıma qyzmetterin kórsetetin «ILP Group» JSHS. Kompanıa jalpy aýdany 100 myń sharshy metrden asatyn zamanaýı logıstıkalyq parkter jelisin basqarady.
Kásiporynda 178 adam eńbek etedi, al 2024 jyly salyq tólemderi 450 mln teńge boldy. Kompanıanyń tutynýshylary qatarynda Sulpak, Air Astana, DHL, Mechta Market jáne OSG Records Management bar. Qazirgi ýaqytta jalpy aýdany 32 myń sharshy metr bolatyn jańa qoıma qurylysy qolǵa alynǵan. Investısıa kólemi 13 mlrd teńge, joba 2026 jyldyń II toqsanynda aıaqtalady.
Sodan keıin qala ákimi «Inter Mýltı Servıs» JSHS kásipornynyń jumysymen tanysty. Bul qaǵaz jáne karton qaptamasynyń jetekshi óndirýshisi. Kásiporyn 1995 jyldan beri jumys isteıdi jáne qaıta óńdelgen shıkizattan ónim shyǵaryp, Qazaqstan men TMD elderiniń naryǵyn qamtamasyz etedi, osylaısha ekologıalyq turaqtylyqqa úles qosyp otyr.
Munda 250 qyzmetker jumys isteıdi. Kásiporyn jyl saıyn 36 myń tonnaǵa deıin qaǵaz jáne karton jáne 37 mln m² gofroónim shyǵarady. Kompanıanyń seriktesteri qatarynda Coca-Cola Kazakhstan, Kaz Snek Saýda, Kulikov, Suńqar, Nauryz Agro KZ jáne Almatylyq ashytqy zaýyty bar.
Jumys saparynyń sońǵy nysany – «SVS-Modýl» JSHS zaýyty. Ol blokty-modýldik ǵımarattar men metal qurylymdar óndirýge mamandanǵan. Kásiporyn 2006 jyldan bastap jumys isteıdi jáne jyl saıyn 5 myń tonnaǵa deıin metal qurylymdaryn, sondaı-aq 50 myń sharshy metr modýldik ǵımarattardy shyǵarady.
Zaýyt QazSınk, ERG, Kazaqmys, KazMinerals sıaqty Qazaqstannyń iri ónerkásip kompanıalarymen seriktestik ornatqan. Óndiris alańy zamanaýı jabdyqtarmen jáne jeke temirjol ınfraqurylymymen qamtylǵan, bul ónimdi daıyndaýdan bastap jóneltýge deıingi tolyq sıkldy qamtamasyz etedi.
Darhan Satybaldy atap ótkendeı, otandyq óndirýshilerdi qoldaý jáne logıstıkalyq ınfraqurylymdy damytý – Almatynyń ınvestısıalyq tartymdylyǵyn arttyrý men ónerkásiptik áleýetin kúsheıtýdiń negizgi baǵyttarynyń biri.
Ákim ekologıalyq tehnologıa engizý, eksporttyq múmkindikterdi keńeıtý jáne jańa jumys oryndaryn ashý qalanyń ekonomıkasyn ornyqty damytýǵa zor úles qosatynyn atap ótti.