Almatyda jylý maýsymyna daıyndyq aıaqtaldy. Qala ákimdiginde ótken keńeste energetıka jáne komýnaldyq kásiporyndardyń basshylary ákim Darhan Satybaldyǵa barlyq jylý maýsymyna qatysty tolyq daıyn ekenin baıandady.
Qalanyń daıyndyq jumystary kezeń-kezeńimen júrgizilip, jylý jelileri men elektrmen jabdyqtaýdan bastap, sýmen qamtamasyz etý, gaz júıeleri jáne áleýmettik nysandardy qamtydy.
Jylý jelileriniń jaǵdaıyna erekshe nazar aýdaryldy. «Almaty jylý jelileri» JSHS jóndeý naýqandaryn jáne uzyndyǵy 23 km-den astam 51 nysandaǵy qaıta jańǵyrtýyn aıaqtady. Gıdravlıkalyq synaqtar júrgizildi, barlyq opressovkalar oryndaldy. Nátıjesinde kásiporynnyń daıyndyǵy 99%.
Sonymen qatar elektr júıelerien jańǵyrtý jumystary jasaldy. «Alataý Jaryq Kompanıasy» AQ josparly jóndeýdiń tolyq kólemin oryndady: 1100 km-den astam elektr jelileri, ondaǵan qosalqy stansıa men transformator daıyndaldy. Búginde qaladaǵy elektr jelileriniń daıyndyǵy 100%.
Aýqymdy jumys jylý kózderinde de júrgizildi. «AlES» AQ óz stansıalarynyń daıyndyǵyn 84%-ǵa jetkizdi. Sonymen qatar, normadan artyq otyn qory jasaqtaldy – kómir boıynsha 119%, mazýt boıynsha 136%. Bul qysty kidirissiz ótkizýge múmkindik beredi.
«Almatyjylýkommýnenergo» JSHS 68 qazandyqtaǵy jóndeýdi aıaqtap, taǵy 17 nysanda qaıta jańǵyrtý júrgizýde. Kásiporynnyń jalpy daıyndyǵy 98% jetti, otyn qory tolyq kólemde jınaldy.
Mańyzdy baǵyttardyń biri sýmen jabdyqtaý jáne káriz júıelerin daıyndaý boldy. «Almaty Sý» SHJQ MKK nysandardyń tolyq daıyn ekenin aıtty: uzyndyǵy 42 km-den astam sý jáne káriz jelileri qaıta jańǵyrtyldy.
Gazben jabdyqtaýdyń turaqtylyǵy da rastaldy. «QazaqGaz Aimaq» AQ Almaty fılıaly barlyq josparly jóndeý jáne rekonstrýksıa jumystaryn aıaqtady. Gaz jelileriniń daıyndyǵy 99%.
Erekshe nazar mektep, balabaqsha, aýrýhana men turǵyn úılerge aýdaryldy. Jylý maýsymyna 412 bilim berý nysany, turǵyn úı qory boıynsha 9117 ǵımarat tolyq ázirlendi. Densaýlyq saqtaý nysandarynyń daıyndyǵy 92%-dan joǵary deńgeıde qamtamasyz etildi.
Sonymen birge ákim qol jetkizgen nátıjemen shektelmeı, daıyndyqty turaqty baqylaýda ustaýdy tapsyrdy. Ol barlyq júıelerdiń táýlik boıy monıtorıńin júrgizýdiń, apatty jaǵdaılarǵa jedel áreket etýdiń, densaýlyq saqtaý nysandary men turǵyn úılerge erekshe nazar aýdarýdyń mańyzyn atap ótti.
Budan bólek, Darhan Satybaldy komýnaldyq qyzmetter men aýdan ákimdikterine tyǵyz baılanysta jumys istep turǵyndarǵa barynsha qolaıly jaǵdaı jasaýdy mindettedi.