Almatyda fandomattar ornatylyp, myńdaǵan plasık bótelke jınaldy
Almaty qalasy ákimdiginde Darhan Satybaldynyń tóraǵalyǵymen «Taza Qazaqstan» baǵdarlamasyn iske asyrý boıynsha keńes ótti, - dep habarlaıdy Aqshamnews.kz.
Qala kúnine oraı ótken senbilikke 6 myń turǵyn jáne 178 tehnıka jumyldyrylyp, 1,5 myń tekshe metr qoqys shyǵaryldy.
Qoqysty bólek jınaý júıesi jolǵa qoıyldy: ákimdik janyndaǵy jobalyq keńse aıasynda qalaǵa 65 fandomat ornatyldy. Olardyń kómegimen 176 myń plasık bótelke jáne 45 myń alúmını banka jınaldy. Jınalǵan qarajat «Araldy qutqarý» qoryna aýdaryldy. Al «Meıirimdi qaqpaqsha» aksıasyna 216 mektep pen 194 balabaqsha qatysyp, barlyǵy 1,26 mıllıon qaqpaq tapsyrdy.
«Jasyl aýla» baǵdarlamasy jalǵasýda: kóktemde turǵyndarǵa 1,3 myń kóshet berildi, qazir aýlalarǵa aǵash alýǵa ótinish qabyldaýdyń jańa kezeńi bastaldy.
Qala aýdandarynda da aýqymdy jumys atqarylýda. Áýezov aýdanynda 971 aýlaǵa qyzmet kórsetilip, 35 myń aǵash sanıtarlyq maqsatta kesildi, sondaı-aq 2025 jyly 28 jańa tehnıka alynǵan. Túrksib aýdanynda 486 kóshe tazartylyp, úsh aýysymdy keste engizildi, 57 qoqys ornyna kamera ornatyldy. 2025 jyly skver, oıyn alańy jáne avtosýarý boıynsha 32 joba júzege asyryldy.
Eń bastysy – aksıaǵa qatysý ǵana emes, otyrǵyzylǵan kóshetterge kútim jasap, ósimdiktiń ereksheligin eskerý ekenin qala ákimi erekshe atady.
«İs-sharany tek ótkizdik dep qana qoıýǵa bolmaıdy. Ár turǵyn alǵan kóshetine durys qarap, qalanyń kógaldanýyna úles qosýy qajet. Kógaldandyrý kezinde ósimdikterdiń syrtqy úılesimin ǵana emes, tabıǵı erekshelikterin de eskerý mańyzdy. Gazonǵa sýdyń az mólsheri jetkilikti bolsa, butalarǵa kóbirek qajet. Eger osyny elemesek, ne gazon, ne butalar qýrap qalady. Sonyń saldarynan artyq shyǵyn shyǵyp, qalanyń kórinisi de buzylady», – dedi Darhan Satybaldy.
«Taza Qazaqstan» baǵdarlamasy – ekologıalyq mádenıetti qalyptastyrýǵa, qaldyqtardy qaıta óńdep, damytýǵa jáne turǵyndardy qalany kóriktendirý isine tartýǵa baǵyttalǵan.