Almaty ákimi Darhan Satybaldy jumys sapary barysynda Almaty Indýstrıalyq aımaǵynda ornalasqan kásiporyndardyń qyzmetimen tanysyp, onyń ári qaraı damýynyń negizgi basymdyqtaryn aıqyndady. Ásirese, óndiristik tıimdilikke, eksporttyq áleýetti arttyrýǵa, ınvestısıa tartý men jerdi tıimdi paıdalanýǵa erekshe nazar aýdardy.
Sapar barysynda ákim eń áýeli aýyl sharýashylyǵy men komýnaldyq qyzmetterge arnalǵan polıetılen qubyrlary men tamshylatyp sýarý jelilerin óndiretin «Irrıgator Kazahstan» JSHS zaýytyna aıaldady. 2024 jyldan bastap kásiporyn joǵary jáne tómen qysymdy polıetılennen ónim shyǵaryp, Qazaqstanmen qatar Reseı men Qyrǵyzstanǵa da jetkizip otyr. Jobanyń quny 2,7 mlrd teńge, óndiristik qýaty jylyna 270 mln metr qubyr, bul shamamen 3,9 mlrd teńgeniń ónimi.
Kompanıa basshylyǵy óndiris kólemin ulǵaıtyp, Kavkaz elderi men Ózbekstan naryǵyna shyǵýdy josparlap otyrǵanyn aıtty. Ákim ónim túrlerin keńeıtip, qubyrlardy sýarý jáne abattandyrý júıesinde qoldaný múmkindigin qarastyrýdy usyndy. Bul Almatynyń Indýstrıalyq aımaǵynyń ishinde de, jalpy qala aýmaǵynda da mańyzdy.
«Jer telimin bólý kezinde ónim túri, ınvestısıa kólemi jáne iske qosý merzimi boıynsha kepildikter qajet. Bul talaptar naqty esepke alynady», – dedi Darhan Satybaldy.
Shahar basshysy olan keıin sáýlettik qasbetter, terezeler, vıtrajdar men áınek paketter shyǵaratyn «Jaryq móldir konstrýksıalar kombınaty» JSHS zaýytyna bardy. Jobanyń quny 3,3 mlrd teńge, jyldyq qýaty 475 myń sharshy metr ónim, 275 jumys orny ashylǵan. Ónim elimizdiń ishki naryǵynda, ásirese Almaty men ózge de óńirlerde joǵary suranysqa ıe.
Turaqty tapsyrystarǵa qaramastan, ákim óndiristi keńeıtip, ınvestısıa kólemin arttyrýdy jáne zaýyt mańyn kóriktendirýdi tapsyrdy. Sonymen qatar, kásiporynǵa qosymsha alań bólý múmkindigin qarastyrý júkteldi.
Sapar aıasynda qala basshysy boıaý-jabyn materıaldaryn shyǵaratyn «BSF» JSHS zaýytynyń jumysymen de tanysty. 2020 jyldan beri júzege asyp jatqan jobanyń quny 1,8 mlrd teńge, 120 jumys orny ashylǵan. Jyldyq óndiris kólemi 10 795 tonna, bul otandyq naryqtyń shamamen 15%-y. Ákim bul óndiristiń qurylys salasyna qajetti otandyq ónimmen qamtamasyz etýde jáne ımporttyq táýeldilikti azaıtýda mańyzdy ekenin atap ótti.
Sapar sońynda ákim úlken dıametrli bolat qubyrlar shyǵaratyn «Asia Steel Pipe Corporation» JSHS zaýytyna bardy. 33 mlrd teńgege baǵalanǵan joba aıasynda 304 adam jumyspen qamtylǵan. Zaýyt jylyna 100 myń tonna ónim shyǵarýǵa qaýqarly. Degenmen, qazirgi ýaqytta suranystyń azdyǵyna baılanysty kásiporyn ýaqytsha toqtap tur.
Ákim kásiporyn ónimin qalanyń ınfraqurylymdyq jobalaryna engizý joldaryn qarastyrýdy jáne respýblıkalyq deńgeıdegi iri tapsyrys berýshilermen áriptestik ornatýdy tapsyrdy.
Sondaı-aq, Indýstrıalyq aımaqta jańa jobalardy irikteý barysynda qosylǵan quny joǵary, zamanaýı tehnologıalardy qoldanatyn jáne eksportqa baǵyttalǵan óndiristerge basymdyq beriletini aıtyldy.
Qazirgi tańda Almaty Indýstrıalyq aımaǵynda jalpy quny 557,6 mlrd teńge bolatyn 118 joba júzege asyrylyp jatyr. 2016 jyldan beri 41 kásiporyn iske qosylyp, 15 myńnan astam jumys orny ashyldy. 2025 jyly taǵy 224,9 mlrd teńge kólemindegi 14 óndiristi iske qosý kózdelgen.
Jumys saparynyń qorytyndysy boıynsha Darhan Satybaldy mynadaı tapsyrma berdi:
• jumys istep turǵan kásiporyndardyń ónim túrleri men ótkizý naryqtaryn keńeıtýge kúsh salý;
• jer telimderin tıimdi paıdalaný men ınvestısıalyq mindettemelerdi oryndaýǵa qatysty talaptardy kúsheıtý;
• tıimdiligi dáleldengen óndiristerge qosymsha alań berý múmkindikterin qarastyrý;
• shaǵyn ónerkásip parkterin damytý, Indýstrıalyq aımaqtyń ınfraqurylymyn jaqsartyp, kógaldandyrý jumystaryn arttyrý.
«Almatynyń múmkindigi mol, ınfraqurylym, maman da, naryq jáne ınvestısıalyq áleýet te bar. Indýstrıalyq aımaq tek ataý úshin emes, naqty óndiristik serpin beretin aýmaqqa aınalýǵa tıis. Biz ári ekonomıkada, ári qalanyń damýynda naqty nátıje kútemiz», – dedi Darhan Satybaldy.