Almaty qalasynyń ákimi Darhan Satybaldy Bostandyq aýdanyndaǵy «Dostyq» saıabaǵynda ótken «Taza Qazaqstan» respýblıkalyq ekologıalyq aksıasy aıasyndaǵy aǵash otyrǵyzý is-sharasyna qatysty.
Aksıaǵa qalalyq máslıhat depýtattary, basqarma qyzmetkerleri, eriktiler jáne belsendi jastar qatysty.
İs-shara barysynda «Dostyq» saıabaǵynda 50 aǵash otyrǵyzyldy, onyń ishinde 10 qaraǵaı, 40 úıeńki, 40 jóke, sondaı-aq 130 buta men 50 sharshy metr aýmaqqa qyzǵaldaq tuqymy egildi. Kóshetter komýnaldyq qyzmet ókilderiniń, jastar uıymdarynyń jáne aýdan turǵyndarynyń qatysýymen arnaıy daıyndalǵan aýmaqtarda egildi.
Darhan Satybaldy ekologıalyq mádenıetti qalyptastyrý men qorshaǵan ortaǵa jaýapty kózqaras tárbıeleý «Taza Qazaqstan» baǵdarlamasynyń basty baǵyttarynyń biri ekenin atap ótti.
«Almaty ejelden elimizdegi eń jasyl qala sanalady. Bul mártebeni saqtaý úshin ár turǵyn turaqty túrde qamqorlyq kórsetip, atsalysýy qajet. Ekologıalyq mádenıet úlgi kórsetý men ortaq iske qatysý arqyly qalyptasady. Mysaly, aǵash otyrǵyzý men qalany abattandyrý sekildi is-sharalar arqyly», — dedi qala ákimi.
Prezıdent bastamasymen júzege asyrylyp jatqan «Taza Qazaqstan» baǵdarlamasy ekologıalyq sana qalyptastyrýǵa jáne eldi mekenderdiń sanıtarlyq jaǵdaıyn jaqsartýǵa baǵyttalǵan.
Baǵdarlama aıasynda Almatyda júıeli túrde kógaldandyrý jáne abattandyrý jumystary júrgizilýde. 2025 jyldyń basynan beri 31 myńnan astam jasyl jelek otyrǵyzyldy, onyń ishinde bıiktigi 6 metrden asatyn 2 myń iri kólemdi aǵash bar. Sondaı-aq, plasık pen alúmını qaldyqtaryn qabyldaıtyn fandomattar ornatylyp, jaramdylyq merzimi ótken dárilerdi jınaý jáne turmystyq qaldyqtardy bólek jınaý aksıalary uıymdastyrylyp keledi.
Aksıa ótken «Dostyq» saıabaǵy Bostandyq aýdanynda, Tımırázev kóshesiniń boıynda, Shashkın kóshesiniń batys jaǵynda ornalasqan. Jalpy aýmaǵy – 3,4 gektar, onyń 2,8 gektary jasyl aımaq. 2020 jyly saıabaqta keń aýqymdy jańartý jumysy júrgizilip, ol turǵyndardyń súıikti demalys oryndarynyń birine aınaldy.